Despues di varios dia di speculacion y presion aumentando riba e tercer gabinete di promer ministro Mark Rutte, finalmente e coalicion di cuatro partido den su totalidad a tuma e decision pa entrega nan retiro awe, den oranan tempran di atardi na Hulanda. Despues di e anuncio haci pa Rutte mes, completamente den estilo Hulandes e ex-promer ministro a subi riba su bicicleta y a haci e recorido den Den Haag pa yega na Paleis Noordeinde, unda Rey Willem Alexander tabata en espera di e mandatario pa acepta su carta di retiro.

Den encuentro cu prensa Hulandes, Rutte a confronta un gran cantidad di pregunta, entre otro el a contesta cu e conclusion di e gabinete tabata cu e conclusionnan di e rapport parlamentario encuanto e manera cu a trata supuesto malversacion cu kindertoeslag, na man di ministerio di asunto social y ministerio di asunto economico, responsable pa departamento di belasting. Nan accion a resulta inhustifica den miles di caso, cu e consecuencia di obligacion di indemnizacion di e famianan afecta den curso di 10 aña, cu e asunto aki tabata tumando lugar. Esaki ademas sin cu realmente tabatin accion contundente di banda di gobierno pa para e inhusticia ey.

Banda di e renuncia completo di e gabinete, ministro encarga cu asunto economico, Eric Wiebes, a dicidi cu su responsabilidad ta pidi pa un gesto mas fuerte, y a pone su puesto di ministro disponible cu efecto inmediato. Ministro di Infrastructura y Waterstaat Cora van Nieuwenhuizen lo reemplaza Wiebes den e gabinete demisionario.

Anterior na e renuncia di e gabinete, ya caba e asunto tabatin consecuencia pa lider politico di e partido social-democrata PvdA, Lodewijk Ascher, cu tabatin e cartera di Asunto Social den pasado, pero durante cu e escandalo tabata tumando lugar, a saca su conclusion y a baha tambe como lider di partido, lagando su partido cu e tarea di nombra otro lider pa proximo eleccion parlamentario na maart.

Durante e rueda di prensa menciona premier Rutte, riba pregunta al caso di prensa, a bisa cu e no a opta pa tuma e decision pa baha como lider di su partido VVD tambe, y ta parce firmemente convenci cu e lo bay pidi voto di confianza di e votadornan den e eleccion parlamentario cu ta tuma lugar dia 17 di maart venidero. Rutte: “Laga e votador dicidi kico nan ta pensa di nos maneho.”