Na december, e companianan Eagle LNG y Quanten LLC a firma cu Refineria di Aruba pa sigui cu negociacionnan, pa asina mira si ta yega na acuerdonan pa Quanten LLC di su banda traha riba e reapertura di e refineria y Eagle LNG riba un proceso/desaroyo nobo. Ayera tabata un dia grandi pa motibo cu a tuma luga e firmamento di acuerdo “Letter of Exclusivity” entre RdA y Eagle LNG pa desaroya un facilidad di gas na Aruba/San Nicolas.
Den un comunicado di prensa, Prome Minister Evelyn Wever – Croes a expresa cu e momento aki ta grandi pa Aruba cual ta trece hopi alegria como cu e desaroyo aki lo crea desaroyo economico pa Aruba, crea cupo di trabou y genera divisa. Presente na e reunion tabata sr. Sean Lalani Presidente di Eagle LNG, Allen S. Greenberg Consul Mericano y Reynold Arends Director di RdA.
Prome Minister Wever – Croes a splica cu unabes e acuerdo concretisa completamente, RdA lo no bay cumpra mas heavy fuel oil pa por ehempel WEB, sino gas pa WEB por bay opera riba gas. E tin hopi beneficio cune manera entre otro e prijs ta stabilisa, prijs di awa y coriente por baha y e tin beneficio pa medio ambiente tambe pasobra gas ta mas limpi cu heavy fuel oil. Ademas e ta trece desaroyo economico cu ne. E compania ta establece su mes na Aruba crea mas cupo di empleo y considerando e compania su plan pa traha tambe mas den exportacion. Esaki lo yuda nos reserva di divisa, crecemento economico y mas entrada pa Gobierno.
Consul di Merca Allen S. Greenberg: “Como Gobierno ta hopi contento pa mira e inversion di un compania Mericano na Aruba cu tur e beneficionan cu esaki ta bin cu ne. Algo cu e Pandemia a mustra nos ta cu ningun Pais por depende solamente riba un industria, pues e desaroyo aki lo crea diversificacion di e economia. No ta solamente e compania aki of e sector aki lo beneficia di e inversion, sino tambe Caribe y Region.”
Director di RdA Reynold Arends: “Cu e firmamento di e acuerdo aki “Exclusivity Agreement” Eagle LNG por cuminsa cu e proyecto mientras cu ta den proceso pa yega na un “definitive contract”. E ta hopi importante pa Aruba yega eynan, pasobra esey lo duna Aruba e oportunidad pa baha su costo di fuel y baha prijs di electricidad.”
Presidente Eagle LNG: “Ya pa un tempo tabata buscando oportunidadnan di inverision den e region Caribense y cu e paso aki caminda cu a firma e acuerdo di exclusividad ta permiti nos pa cuminsa cu e inversionnan na Aruba. Pues lo inicia di biaha cu e procesonan necesario di ekiponan pa e terminal y pa e proceso permanente tambe. Nos vision y speransa ta pa por cuminsa temporada di zomer e aña aki of tiki prome. Considerando e desaroyo actualmente den e industria di crusero y cerca Paisnan den region cu ta cambiando pa Liquefied Natural Gas (LNG), e terminal na Aruba na San Nicolas lo permiti pa mas expansion y oportunidad den forma di desaroyo economico y trabou na Aruba.”
Concluyendo Prome Minister a gradici esnan envolvi den e proceso: “Ta hopi agradecido na RdA pa e rol cu nan a hunga den e negociacion importante aki pa cual mester bisa cu nan a consulta cu WEB caba riba e tema. Tambe ta hopi agradeci na e consul di Merca sr. Greenberg, cual apenas dos aña y mey pasa mi a biaha pa Washington hunto cu Premier di Corsou e tempo ey y a pidi nan na Washington pa yuda nos pa nos desaroya nos economia. Y awe por mira e fruto di e trabounan haci. Pues mi ta hopi contento cu e actividad di e firmamento, e tabata un bon reunion y ta hopi optimista y positivo”, e comunicado ta finalisa.
