Supuestamente na e momento aki nos un tipo di ‘adempauze’ tumando lugar. Aña a habri cu gobierno declarando cu e ayudo Hulandes lo sigui, por lo pronto, di manera cu subsidio riba salario y aporte pa esnan desemplea ta continua cu Fase. Apoyo na empresa medionano y chikito tambe ta sigui, di manera cu nos no mester preocupa di e banda ey. Cu otro palabra: nos por bay drumi tranquil, pasobra ‘tur cos ta bao control’?
E ta leu di ta asina. E problema ta cu nos no ta tende nada. Y esey riba diferente tereno. Manera encuanto finanzas publico, unda nos por imagina cu lo bay tuma cierto medida, pero no cu nos ta haya tende kico ta kico. Cu e anuncio cu na fin di februari presupuesto lo ta na parlamento ta bisando nos cu otro palabra cu te e momento ey, probablemente nos no ta haya nada di scucha kico lo ta e maneho financiero. Esey pa e ciudadano individual esey caba ta un violacion di su derecho di haya informacion promer cu aña cera kico gobierno tin pensa di haci, pero esaki tambe ta conta pa e empresario, cu tin cierto responsabilidad pa su empleadonan, pero no por duna claridad pasobra e tampoco no sa den ki direccion e asunto ta bay. Naturalmente e tambe a tende di e frasenan di propaganda di ‘elimina red tape’ pero te awe no ta mira concretisacion di esaki. Aki no ta trata solamente di e medidanan cu ta haci e trayecto pa negoshi nobo mas facil, sino cu ta trata tambe di e stuacion pa empresanan estableci, cu na e momento aki ta hinca den un situacion dificil.
Di un banda ta bunita y noble pa un empresa ricibi ayudo den forma di subsidio di salario, pero cu e crisis bayendo pa casi un aña, y nos no ta bisa esaki pa promer biaha, ta bira mas y mas dificil pa continua un empresa, cu ta cerca di agota tur reserva financiero cu nan por tabatin. Esaki ta obliga nan pa considera un otro caminda cu na e momento aki ta imposible, cu e condicionnan imponi pa implementa e subsidio. Tin negoshi cu na e momento aki ta considera seriamente pa termina nan operacion completamente, pa por bolbe den operacion na un otro momento. Di tur manera, si nan sigui riba e rumbo actual nan lo mester termina operacion tambe, den cierto caso cu un bancarota como consecuencia. Restructuracion lo por ta un opcion, den circunstancia normal, pero awor nan tin e problema di e subsidio di salario cu nan a acepta, y ademas gobierno, violando ley, no ta ni acepta peticion pa retiro. Esey ta laga solamente un ruta habri pa logra retiro di un parti di e payroll, pa por salba e empresa den su totalidad y preveni bancarota. Nos a comprende cu huez den un algun caso caba no kier a atende e peticion pa retiro y a referi e empresa na director di Labor, cu pa ley mester acepta por lo menos e peticion y tramita esaki segun ley ta prescribi. Ningun dia nos a tende argumento, ni valido ni invalido pakico e director no ta actua segun ley. E simple orden di su ministro no por ta suficiente motibo pa e no cumpli cu ley. Di tur manera, nos no ta mira con ta bay sali for di e impasse aki, pasobra pa e empresanan cu no por wanta e presion mas, e unico caminda lo ta cera porta y pone tur trahador riba caya, punto. Cu e situacion manera cu e ta awor, y e perspectivanan di e proximo lunanan, unda tanto Merca como Europa ta hinca den un crisis grandi di Covid-19, e mihor salbacion pa nos, un reactivacion di industria turistico, ta mustra un soño bunita, pero remoto.
Comprende bon, nos no ta culpa gobierno pa e situacion aki. Tin cos cu por haci y otro cos no. Pero loke ta inexplicable cu no ta duna ningun claridad na e momento aki y ta manda nos ‘bon mucha’ warda te fin di otro luna pa nos haya sa ki direccion nan a scoge hunto cu Hulanda! Esaki absolutamente no ta manera di trata di un comunidad, cu di mes caba a mustra comprension cu no a entrega plan y presupuesto dia 1 di september, manera ley ta prescribi. Pero cu awor ainda no ta duna claridad ta haci cu henter sector priva ta habri aña sin sa di ki banda gara. Aki nos tin e sentimento cu e partidonan cu ta sostene gobierno ta pone nan interesnan promer cu esun di Aruba, tratando mas largo posible, ta aña di campaña electoral, pa no duna claridad. Esaki lo ta un concepto completamente eroneo, na promer lugar pasobra nan debe nos e claridad ey, y na di dos lugar nan no mester tin tanto miedo pa saca e asuntonan ey, pasobra ta poco loke oposicion por haci cu nan. Gran parti di poblacion di Aruba tabata di acuerdo pa cera un acuerdo cu Hulanda, pa salba nos tur. E consecuencianan pa tur partido ta igual: esun cu goberna despues di fin di september lo mester continua riba e caminda stipula pa recuperacion. Pero e incertidumbre artificial crea awor no tin hustificacion.
