Parlamentario Richard Arends (AVP): Riba IPKO: Un biaha mas a boga pa un rol mas activo den asuntonan di Reino

Diaranson cu diahuebs ultimo a tuma lugar e reunionan interpalamentario (IPKO) hunto cu Parlamento di Hulanda, Aruba, Corsou y Sint Maarten pa discuti temanan en comun.“Cu un agenda menos yen cu normal, pero sinembargo di igual importancia. Nos a comparti con cada Pais ta atendiendo cu e retonan di e diferente brotenan di infeccion di COVID-19, e condicionan di e sosten financiero y institucion di e organo caribense pa recuperacion di desaroyo (COHO), como tambe strategianan di vacuna y recuperacion economico den ediferente paisnan” asina Parlamentario Richard Arends (AVP), miembro di e Comision Fiho di Parlamento di Aruba pa Asuntonan di Reino y Relacionan Externo, a declara.

“Un punto cu sigur a bin dilanti ta e posicion di e parlamentonanden proceso di institucion di e organo caribense pa recuperacion di desaroyo (COHO) cu ta sosode pa medio di un Ley di Reino, unda cu Parlamentonan di e Paisnan Caribense tin un rol masha limita den e proceso prome cu su institucion,” Parlamentario Arends a splika. E la splica tambe cu e rol di Parlamento despues cu e Leynan di Reino wordo aproba tambe ta limita di un manera of otro, mirando cu e derecho di iniciativa, amienda y control riba topiconan unda cu Gobiernonan a sera acuerdo riba nan y cu ta forma condicionan pa sosten di likides, lo ta minimo.

“Como Parlamento nos mester percura pa e derecho fundamental di nos democracia keda manteni, con nos por keda eherce trabou di control riba e diferente gobiernonan y con por garantisa cu derechonan constitucional di e ciudadanokeda wordo manteni y protehi.E concepto di Ley di Reino pa insititucion di e organo di reforma ta canando su caminda via Raad van State y ainda mester wordo trata den Tweede y Eerste Kamer den algun luna.”

“Aunke cu e aspecto di salubridad publico tin prerogativa den e periodo nos dilanti, miembronan di IPKO a para keto riba recuperacion economico, como tambe e oportunidadnan y retonan cu lo mester afronta. Mientras cu sosten financiero ta e prome paso, pero e discusion nan riba plannan riba termino cortico pa asina por rehabilita nos economianan mester sigui.”Parlamentario Arends a sigui splika cu Reino riba su mes no ta un entidad cu tin fondo;ta estado Hulandes ta esun cu ta otorgando fiansanan na e islanan aki. Durante e reunionan a subraya e hecho cu mester tin un participacion mas activo di e Parlamentonan di Aruba, Corsou y Sint Maarten, ora ta trata asuntonan di Reino den Parlamento Hulandes.

E siguiente IPKO lo ta na luna di juni y Hulanda lo ta e pais anfitrion. Varios miembro di e Comision Permanente di Asuntonan di Reino di Parlamento Hulandes, lo retira di politica despues di eleccion na Hulanda na maart venidero manera e.o. Antje Diertens (D66), Andre Bosman (VVD) y Ronald van Raak (SP).