Appnan di mensahe cifra, Signal y Telegram, ta mirando un aumento enorme den download for di tienda di app di Apple y Google. WhatsApp, propiedad di Google, den contraste, ta mirando su crecemento reduci despues di un fiasco cu a forsa e compania clarifica un update di privacidad cu a manda su usuarionan.
Compania di analitica di app mobil, Sensor Tower a bisa diaranson cu Signal a mira 17.8 miyon download di su app riba Apple y Google den siman di 5-12 di januari ultimo. Esey ta un aumento di 61 biaha riba e apenas 285mil e siman anterior. Telegram, un app di mensahe cu ya tabata popular mundialmente, a mira 15.7 miyon download den e mesun periodo, casi dobel e cantidad di 7.6 miyon download cu a mira e siman anterior.
Mientras tanto download di WhatsApp a reduci na 10.6 miyon, menos cu e 12.7 miyon e siman anterior.
Expertonan ta kere cu e cambio por refleha e fluho di usuarionan conservador di rednan social buscando alternativanan pa plataforma manera Facebook, Twitter, y e website derechista awo clausura, Parler. E websitenan popular a suspende presidente Donald Trump siman pasa y a reforsa cumplimento di reglanan contra incitacion di violencia y discurso di odio.
Mientras tanto, a elimina Parler inceremoniosamente for di internet, despues cu Apple y Google a prohibi esaki for di nan tienda di app pa fayo di modera incitacion. Despues Amazon a elimina Parler for di su servicio di cloud-hosting. Expertonan ta preocupa cu e movidanan aki por conduci na mas fraccionamento ideologico y sconde extremismo den skinanan scur di internet, haciendo mas dificil pa track y combati esaki.
WhatsApp no a yuda su mes na momento cu recientemente a bisa su usuarionan cu si nan no acepta un politica di privacidad nobo pa dia 8 di februari, nan no por usa e servicio mas. E noticia a haci referencia na e data cu WhatsApp ta comparti cu Facebook, cual mientras no ta algo nobo, por a mustra asina pa algun usuario.
Confusion tocante e aviso, complica pa e historia di Facebook contra privacidad, a forsa WhatsApp pa clarifica su update na usuarionan e siman aki. E compania ta bisa cu su update ‘no ta afecta e privacidad di bo mensahenan cu amigo of famia den ningun forma’, agregando cu e cambionan den politica tabata necesario pa permiti usuarionan manda mensahe na negoshinan riba WhatsApp. E aviso ‘ta duna mas transparencia tocante con nos ta colecta y usa data’, e compania a bisa.
WhatsApp ta keda como e app di mensahe mas popular di e tres, y te awo no tin evidencia di un exodo masal. Sensor Tower ta calcula cu a Signal a wordo instala alrededor di 58.6 miyon biaha rond mundo desde 2014. Den e mesun periodo, Telegram a mira 755.2 miyon instalacion y WhatsApp un enorme 5.6 biyon – casi ocho biaha e cantidad di Telegram.
