Robert Candelaria, parlamentario di partido AVP tocante su presunto retiro: “Con un hende por comparti un mentira, sabiendo cu ta un mentira”

Diaranson ultimo riba rednan social a core e rumor cu parlamentario di partido AVP, Robert Candelaria kier entrega su retiro di partido y entrega su asiento back den parlamento. Pa cu esaki Candelaria a ofrece un declaracion pa medionan di comunicacion, den cual el a desmenti e rumornan.

Candelaria a gradici cu su integridad a wordo reconoci, asina mes el a conta cu el a keda hopi asombra na e momento, di “con un hende por comparti un mentira, sabiendo cu ta un mentira, como si fuera ta un berdad.” Esaki ta algo cu el a tuma pa sigui cu e bon trabao, manera e mes a sigura.

Den dianan aki, sector enseñansa ta un cu ta wordo menciona pa diferente motibo. Candelaria a comenta cu minister di Enseñansa, Armando Lampe, dialuna ultimo den su conferencia di prensa a anuncia cu e ta reduci gastonan den sector aki, pero cu “gobierno mes ta bezig tumando hende den otro departamentonan y hasta departamentonan nobo cu nan ta lantando den ultimo tempo.”

Igualmente el a declara cu gobierno no sa na unda mester reduci gasto y unda mester inverti. “Ni un gobierno mester hacie su proposito pa reduci gasto den enseñansa, no di e forma aki, na unda mester inverti den e siguiente generacion pa asina sa cu pueblo ta educa”, Candelaria a bisa.

Di loke ta trata sector salud, Candelaria a conta cu un grupo di 15 profesional di salud a manda un carta pa parlamento y gobierno, den cual nan ta haciendo un yamada urgente na gobierno, bisando cu manera cu gobierno ta haciendo y cortando den mundo medico, nan no por sigui asina.

Candelaria a comenta cu ta importante pa sa ken tur ta para aden. Como ehemplo a menciona director di Imsan, director di Respaldo, director di SABA, entre otro institucionnan di salud cu segun el a sigura, esaki no por ta algo politico. Ta hendenan cu ta purbando di haya atencion di gobierno bisando cu loke ta pasando den sector medico, memey di e pandemia aki, ta inaceptabel.

Den e carta, nan a expresa cu na Aruba e hende cu ta traha den sector medico compara cu resto di paisnan di reino, nan salario ta esun cu ta mas abao. “Nos tin un nivel di servicio hopi halto pero e gastonan ta abao”, Candelaria a señala.

Ademas, nan a bisa cu si den tempo aki di pandemia nan ta sigui corta den sector medico hopi di nan lo busca un otro luga cu un miho porvenir pa nan y pa nan famia.

Di mesun manera, el a conta cu desde introduccion di AZV e mundo medico na Aruba a keda pasa den ronda tras di ronda di reorganisacion pa nan purba di subi eficiencia y baha gastonan, di esaki Candelaria a expresa cu no ta nifica cu tur hende ta satisfecho cu sector medico, pero ta nifica si cu compara cu e resto di e region Aruba tin esun di mas miho pa loke ta trata e calidad di servicio na e prijs cu ta mas pagabel posibel.

Esaki a yega te na e punto cu por a mira recientemente cu hasta AZV a cera cu un surplus riba presupuesto, esaki ta bin door di maneho pa busca aumenta eficiencia, drecha miho e servicio y na mesun momento baha e gastonan.

“Pero loke nos ta keda mira ta cu aki ta e caminda cu gobierno ta corta, akinan gobierno ta reduci gasto y na mesun momento keda yuda nan mesun hendenan pa haya trabao”, Candelaria a manifesta.

“No ta asina cu ta Gobierno di Hulanda a pone como condicion cu Gobierno di Aruba mester corta den nan gastonan medico”, esaki tabata di comienso un plan di Gobierno di Aruba mes y Hulanda a bay di acuerdo cune, el a trece dilanti esaki pa motibo cu dia 19 di mei di aña pasa secretario di Estado Raymond Knops a manda un carta pa Tweede Kamer na Hulanda na unda ta comenta cu Aruba tabatin e plan caba pa reduci cu cinco miyon den AZV, algo pa lo cual segun Hulanda a bisa ‘dal bay’.

Ora a bin preguntanan pa Knops clarifica riba e tema aki, el bolbe manda un carta dia 27 di october di 2020 na unda el a declara pa Tweede Kamer cu Gobierno di Aruba forma pa MEP-POR-RED a laga di haci un investigacion cu a conduci na un rapport.

Den rapport aki, Candelaria a splica cu ta bisa con por yega na e cortamento y reduccion di gastonan den AZV, cu no ta Hulanda esun cu a exigi esaki sino Aruba a manda haci e investigacion aki algun tempo pasa.

Den tema di siguridad, Candelaria a menciona cu algun miembronan di cuerpo di polis a sali positivo pa Covid-19 y nan a hiba e malesa pa nan famia, esaki ta pa motibo cu den nan trabao nan ta haya melding y tur sorto di incidente cu nan tin cu handle caminda cu por ta nan ta haya hende cu Covid-19 y nan tin cu actua, como por ehemplo cera fiestanan clandestino cu tin tur e risiconan y gobierno ta corta den nan salario tambe.

Pa finalisa, Candelario a duna di conoce cu Gobierno ta buscando hende pa traha den bureau di Cannabis Medicinal, “algo cu no ta make sense si bo ta cortando den sector salud”, el a señala.