Gabinete Wever-Croes a identifica “E-Governance” como un componente importante na yuda Gobierno di Aruba maximalisa eficiencia den e aparato publico. Ta p’esey e la keda hancra como punto importante den e Plan di Gobernacion. Pero e pandemia di COVID a impacta nos comunidad na un manera brutal. No solamente nos a haya nos ta sinta na mesa cu Hulanda pa negocia un ayudo den forma di un entidad nobo (COHO), ademas e la forsa nos na realisa cu e necesidad digital a bira awor hasta mas grandi di loke e tabata prome cu e pandemia.
E “lockdown” na Hulanda ta un ehempel bibo con COVID por afecta e funcionamento normal tanto di e aparato publico como e sector priva di un Pais. Y ta pa motibo di e lockdown aki mes a yega na decision cu Arubahuis lo bira e prome instancia di
Gobierno den cual e diferente facetanan di e plan di implementacion di e-Governance lo bira operacional” Minister Plenipotenciario, sr. Guillfred Besaril, a declara na salida di un reunion di diahuebs ultimo cu Prome Minister, sra. mr. Evelyn Wever-Croes. E reunion aki tambe a conta cu e presencia di entre otro sr. mr. Glenn Ling, director a.i. di Arubahuis.
Durante e reunion a papia encuanto tur e acontecimentonan rond di e entidad COHO. Esaki ta un desaroyo cu ta forsa Pais Aruba, no solamente na garantisa e bon funcionamento di Arubahuis, pero na prepara y ekipa e organisacion en bista di e papel importante cu Arubahuis lo tin di desplega den e relacion nobo entre Aruba y Hulanda a traves di e entidad aki. ‘Manera mi a bin ta anuncia e binimento di un COHO ta trece cune cu e dinamica con Arubahuis ta funciona y kico ta bay ta e papel cu e ta desplega 2021 en adelante ta bay cambia drasticamente! Aña pasa na maart, conseho di minister a aproba un reorganisacion. Lamentablemente COVID a haci su
aparicion y esey a haci cu parti di ehecucion di e proyecto aki mester a dal para. Pero nada no ta pasa pornada. Nos a realisa nos mes cu e la para na un bon momento. Awe nos por refleha y haci uzo di e oportunidad na redefini caminda cu a bira necesario, pa e reorganisacion ta un respuesta na e realidad nobo cu nos ta aden. Nos a nota cu pareu e reorganisacion drenta e fase di
ehecucion lo mester bini por lo menos dos funcion nobo. Esaki ta un punto cu lo mi atende cu DRH con lo trata esaki. Nos a acorda si cu lo ehecuta e reorganisacion manera aproba na maart di 2020 y despues lo atende cu e cambionan pa evita mas tardansa’ minister Besaril a sigui
elabora.
E mandatario a sigui declara cu tambe a para keto na e aspecto humano di e organisacion y cu e reorganisacion ta necesario primordialmente pa duna e personal di Arubahuis e atencion cu pa
hopi tempo nan no a ricibi. Minister Besaril: ‘E ta logico cu si reorganisa un departamento y bo no atende cu puntonan manera Trayectoria (por ehempel promocionnan pendiente) y Preparacion (por medio di formacion) di e trahadornan, garantisa cu e cambio cu bo kier trece lo no tin e impacto desea. Mi a comparti cu sra. Prome Minister cu den e proximo periodo 2020 – 2022 practicamente un tercera di trahadornan di Arubahuis lo alcansa nan edad pa bay cu pensioen. Pues un momento pa tuma hende nobo den servicio cu ya ta cuadra cu e profielnan nobo. Esaki ta yuda cu e peso cu e tema “Capacitacion di Personal” ta trece cune. Aruba su recursonan financiero ta masha limita, pues nos tur mester “Frifi riba Friri” mane mi grandinan tabata bisa, pa nos por keda cumpli cu nos compromisonan como Pais’ minister Besaril a finalisa.
E potret ta cortesia di Gobierno di Aruba.
