Minister Dangui Oduber: Pa luna di december 2020 Aruba a recupera 43% di nos turismo stayovers

Luna di december 2020 tabata e miho luna pa Aruba su turismo desde cu nos a habri nos fronteranan bek na juli 2020. E tawata un aña sumamente dificil pa Aruba, nos turismo y nos economia. No obstante tur obstaculonan y tur e retonan e aña aki pa nos turismo pais Aruba a percura pa tin un di e miho protocolnan in place pa habri nos fronteranan bek. 

Aruba ta keda wordo considera un trendsetter den e manera cu nos a maneha covid-19 y tambe e forma con nos a habri nos fronteranan na juli 2020.

Nos a introduci un PCR test mandatorio desde juli. Awe ta wak masha hopi pais na mundo haciendo mesun cos 7 luna despues di nos. Nos a introduci un seguro obligatorio cu a duna resultado cu nos tawata desea. Nos a introduci e Aruba health app cu turista y local por download pa ricibi resultado di nan PCR test dentro di 6 ora di tempo.

Y awor nos ta e prome pais na mundo cu a join e common pass network.

Esaki ta un partnership cu tur e mayor airlines nan y tambe world economic forum pa tin un sistema digitalisa pa verificacion di PCR test y tambe vacuna.

Ministerio di turismo conhuntamente cu ATA, AAA y Ahata a bin ta trahando hopi duro riba recuperacion di nos turismo. Den luna di december nos a anuncia un vuelo direct cu Jetblue for di La Guardia New York. Un vuelo importante pa Aruba cu sigur lo duna su frutonan. Den pleno pandemia Jetblue a demostra un confianza den habri un ruta nobo pa Aruba. Nos a mira tambe un otro vuelo directo esun di TUI for di London cu lamentablemente a wordo para debi na e Lockdown na Inglaterra.

Aruba habri su fronteranan bek na Juli 2020 y nos por mira e ultimo lunanan cu gradualmente nos turismo ta creciendo. E luna di september 2020 nos a mira un caida pero pa loke ta e resto di lunanan tin crecemento. Oficina di turismo a sali for di 2 scenario pa loke ta trata nos recuperacion. Tin e scenario optimista y e escenario conservativo. Minister Oduber ta informa cu nos a cera e aña yegando cerca di e scenario conservativo. Obviamente e pandemia y e situacion na otro paisnan tin su consecuencia riba turismo.

Aki por mira e ultimo lunanan con nos turismo a crece gradualmente:

Minister Oduber ta satisfecho cu nos ta mira cu gradualmente nos turismo ta recuperando. Naturalemente e deseo lo tawata pa nos por ta mas cerca di e scenario optimista pero esaki no ta e caso. Minister Oduber ta consciente cu e situacion na Merca y na Europa ta keda uno preocupante y obviamente esaki tin su repercusionnan pa nos turismo. Di otro banda minister Oduber ta convenci cu aña 2021 lo ta un miho aña pa Aruba y nos turismo considerando cu e vacuna ya caba ta riba mercado y dentro di poco na Aruba tambe. Cu e yegada di e vacuna ta e comienso pa nos por recupera nos turismo y economia minister Dangui Oduber a finalisa bisando.