Cabando cu e confusion tocante e destino di Paris Fashion Week, cuerpo regulador di moda Frances a bisa cu e shownan di haut couture y di moda masculino na Paris lo ta estrictamente liber di audiencia tocante miedo pa coronavirus.
E Fédération de la Haute Couture et de la Mode a bisa casnan di luho cu no lo permiti nan pa tin invitadonan e temporada aki, riba instruccion di polis. Den un declaracion na AP, e federacion a bisa ayera cu ‘nos ta confirma cu no por tin reunion publico’ na Paris Fashion Week, agregando cu ‘casnan por sigui organisa shownan di pasarela ‘real’ cu modelonan transmiti en bibo, tanten cu nan eventonan tuma luga tras porta cera’.
Maske Paris tecnicamente no ta bao lockdown, restriccionnan stringente limitando movemento ta na vigor nacionalmente, incluyendo un toque de queda cuminsando pa 6pm of 8pm. Fayo pa cumpli cu e reglanan por resulta den un sentencia di seis luna den prison. E segundo lockdown na Francia a termina dia 15 di januari, pero restaurant, bar, cinema, teatro y museonan a keda cera.
Respecto Milan Fashion Week, a pesar di e miho esfuersonan di conseho di moda Italiano pa mantene un nivel minimo di shownan en bibo, marcanan top tambe a opta pa mustra nan coleccion sin invitado, periodista of fotografonan presente.
E region Lombardia, unda Milan ta ubica, ta parce di ta na caminda pa un otro lockdown parcial.
Fendi, Dolce&Gabbana y Etro tur a bisa cu nan show no lo inclui invitado. Nan tabata entre cuatro marca planeando shownan en bibo e temporada aki. Representantenan di K-way, fabricante di paña luhoso pa exterior cu tin un show programa, no a responde na peticion pa comentario.
E kalender di Milan Fashion Week di 15 pa 19 di januari ta hopi reduci cu normal, cu apenas 40 marca participando.
