Honduras ta acercando pa 128.000 contagio y 3.300 morto pa Covid-19, sin conoce e real expansion di epidemia y e menasa di e nobo variante di e virus identifica na Reino Uni, den dies luna di e confirmacion di e prome dos contagio.
“Nos ta kere cu tin hopi mas casonan di esun cu ta wordo reporta oficialmente”, presidente di Asociacion di Medico di Instituto Nacional Cardiopulmonar di Tegucigalpa, Suyapa Sosa a bisa.
Cu un total di 127.945 caso, segun datonan di Sistema Nacional di Gestion di Risico (Sinager), Honduras ta di cuater pais di Centro America den number di contagio, despues di Panama, Costa Rica y Guatemala.
E cifra di mortonan ta alcansa 3.273, aunke Sosa ta kere cu por tin hopi mas, ya cu ta conta solamente di manera oficial e fayecido pa coronavirus confirma, no esunnan cu ta fayece den nan cas, e cual no a wordo realisa ningun prueba of no ta coloca den nan acta di fayecimento cu nan a muri pa Covid-19.
“E cifranan mas real di mortonan ta esun di e funerario (cu ta reporta mas di 7.000 morto), nan ta esun mas confiabel den sentido cu nan ta ricibi e carta di fayecimento pa por bende e caha di morto”, el a señala.
E solucion pa conoce e cifranan real, segun Sosa, ken ademas ta hefe di departamento di Neumologia di instituto aki, conoci como Hospital di Torax, ta pa haci mas test na e pais.
El a lamenta cu no por a practica te awor por lo menos 3.000 prueba pa dia, manera mediconan di hospital publico cu ta enfrenta e pandemia a recomenda.
