Ayera mainta na Renaissance Covention Center a introduci e plataforma Insight Insurance, introduciendo asina un comprobante digital pa ora ta haci uso di autonan na Aruba.

Manera ta conoci, ora di bay busca un plachi di number pa auto, e persona mester tin un comprobante di seguro pa asina por ricibi e plachi nobo pa core auto legalmente riba caminda.

Minister di Finanzas, Asuntonan Economico y Cultura, Xiomara Maduro, cu tabata presente den lansamento aki, a expresa cu esaki ta forma parti di e-Government, caminda ta bayendo mas den e parti di digitalisacion. Pero hunto cu esey tambe tin un master plan pa reactiva economia di pais Aruba, ademas cu aña aki 2021 ta e aña di recuperacion.

Di su parti, minister di Husticia, Andin Bikker a menciona cu Gabinete Wever-Croes a duna atencion special pa e programa di digitalisacion y den esaki, nan a cera acuerdonan cu otro paisnan como Estonia, cu ta un di e lidernan mundial pa loke ta trata E-Government.

Den cuadro di Ministerio di Husticia, nan a caba di decreta un par di siman pasa un decreto den cual a pone den e base huridico pa por tene un rijbewijs digital. Na momento cu a presenta e proyecto aki, el a pasa den e cuadro di maneho cu pa tres aña largo nan ta hibando pa procesonan cu ta birando digital.

Lisa de Gouveia, director di Insight Insurance Platform, a duna na Aruba un bonbini pa e plataforma aki cu ta ofrece na companianan di seguro e posibilidad pa crea, distribui y maneha prueba di seguro di un manera completamente digital, eficiente y sigur. Di e manera aki, e informacion di e prueba di seguro por wordo comparti cu stakeholders.

El a expresa cu e proceso tin hopi beneficio no solamente pa companianan di seguro y su procesonan interno, pero tambe pa stakeholders den e manera cu nan ta controla y valida e prueba di seguro y tambe pa e cliente, cu ta e asegurado.

Pa cuminsa, e clientenan no mester bay te na e compania di seguro fisicamente pa tuma nan pruebanan di seguro, sino cu awor nan ta bay haya esey via di e-mail of via rednan social, manda via telefon y esaki ta wordo actualisa den tempo real pa e sistema di compania di seguro y por controla na ki status e polisa di seguro ta.

Guardian Group Fatum, Citizen y Ennia, cu ta e companianan di seguro cu a uni pa e iniciativa aki na luga di nan a bay competi cu otro pa lansa algo nobo riba e mercado nan a “cera cabes” manera de Gouveia a sigura, pa pusha pa e innovacion aki lo bira un realidad hunto cu e colaboracion di Departamento di Impuesto, Cuerpo Policial y Gobierno di Aruba.

E meta ta pa eventualmente tur compania di seguro of e mayoria di nan subi riba e plataforma pa asina nan por tin un sistema integral y centralisa cu di berdad tin beneficio pa henter industria.

De Gouveia a duna di conoce cu e digital pass ta wordo crea for di e plataforma di Insight y e plataforma aki tin interfase den e sistema administrativo di companianan di seguro, loke ta nifica cu na momento cu un polisa nobo lo wordo crea of tin cambio riba dje e sistema di compania di seguro ta papia cu interfase di Insight pa asina crea e digital pass.

Na momento cu e digital pass ta wordo crea, ta mand’e automaticamente pa e-mail di e cliente of via rednan social cu tambe ta posibel y na e momento cu e ta ricibi esey e ta descarga e pass cu tin un QR Code cu ta unico y cu por wordo usa pa stakeholders pa controla si de berdad esey ta valido.

“Loke ta mitiga fraude tambe” De Gouveia a comenta.

Asina mes, el a destaca cu e informacion semper lo keda actual, mirando cu na momento cu un cambio ta wordo haci den e sistema di compania di seguro e ta refleha den e digital pass di e cliente.

Ademas, Vanessa Kock halto comisario di Cuerpo di Polis di Aruba a ofrece algun palabranan den cual el a trece dilanti cu esaki ta nifica innovacion den procesonan di trabou di cuerpo policial, e cual ta un di e partners mas importante pa loke ta trata control di seguro riba caya ora ta papia di un auto, esaki sigur cu na base di cooperacion cu tin entre companianan di seguro y tambe cuerpo policial conhuntamente cu Ministerio Publico nan por a realisa cu esaki.

“Esaki ta nifica adaptacion di nos procesonan pero tambe di nos materialnan cu ta wordo exigi pa nos por cumpli cu e calidad di servicio cu nos kier duna na e comunidad” Kock a sigura.

Director suplente di Departamento di Impuesto, Angeline Geerman a manifesta cu den e departamento nan a cuminsa cu e proceso aki e aña pasa pa loke ta trata digitalisacion y cu nan ta apoya e proyecto piloto aki e cual ta un triangulo, pa motibo cu prome cu nan lo mester otorga un plachi di number nan mester controla si e auto tin un seguro valido, loke ta nifica mas papeleo y rijnan largo, “y esaki ta un innovacion cu nos ta apoya pasobra e ta haci e trabou mas eficiente”.

E personanan lo no mester para den rijs mas y no mester comproba mas na base di papel cu e seguro di auto ta valido sino cu ta wordo controla cu e QR Code.