Lock down na Hulanda y Inglatera ta afecta nos turismo; Na maart Aruba lo por cuminsa recupera turismo di mercado Europeo

Minister di Turismo, Dangui Oduber a informa cu e cantidad di turista cu ta bin bishita Aruba ta sigui aumenta tur luna. Na luna di november ultimo nos a ricibi alrededor di 30 mil bishitante.

Mientras cu pa luna di december nan ta maneha dos scenario. Uno conservativo cu ta mustra cu nos a ricibi 45 mil turista. Y otro escenario optimista cu ta indica cu nos lo por a ricibi 65 mil turista. Pero cerando e cifra di e luna festivo di december, nan ta mustra cu e ta mas cerca na e escenario conservativo. Pero te ainda nan no tin e cifra exacto. “Na luna di december nos mester ta satisfecho con el a bay,” e mandatario a declara.

Paspoort digital

Despues cu Aruba a cuminsa habri su frontera gradualmente a keda introduci un serie di exigencia, rekisito y aplicacion (app) pa asina maneha e tema di Covid.

E mandatario a bisa cu recientemente Aruba a yega na un palabracion pa nos isla lo bira e prome pais cu ta cuminsa cu e proyecto piloto pa e paspoort digital. E ta bay fungi como un documento digital pa por controla si un persona a ricibi un vacuna. Of si e persona a yega di haci un PCR test, tur e informacion aki ta wordo baha pa medio di e Aruba Health App. E mandatario a bisa cu nan ta decisionnan cu nan a tuma pa asina recupera nos turismo mas pronto cu ta posibel.

Recuperacion y mercado Europeo

El a declara cu nan a desea pa luna di december por a bay hopi mas miho di loke el a bay, pero keto bay nan ta sinti cu Aruba ta recuperando su turismo.

E hecho cu tin un vacuna na caminda -segun e mandatario- nan ta convenci cu 2021 lo bira un aña un aña di recuperacion, caminda nos lo por mira un crecemento substancial den comparacion cu aña 2020. “Cual tabata e aña di mas dificil den historia di nos turismo di nos pais,” el a declara.

Pa loke ta e desaroyo di e pandemia na Europa y tambe e situacion cu Inglatera ta pasando aden cu a conduci cu nan gobierno a bin cu un lock down, ta un situacion cu e mandatario a lamenta y cu tin su impacto pa nos turismo tambe.

El a relata cu despues di un periodo largo di negociacion cu e compania aereo TUI, nan a logra habri e ruta directo entre London y Aruba. E vuelo aki na luna di december tabata exitoso. Pero den e mesun luna aki, Inglatera a identifica un mutacion di e virus Covid-19 y tambe den otro pais di mundo.

E ta lamenta cu e vuelo di TUI no por a continua, ya cu nan tabata treciendo turistanan afluente for di Inglatera. Pero dialuna e Prome Minister Britanico a anuncia cu henter e pais ta bay den lock down. “Obviamente esaki ta bay afecta e vuelo directo di TUI,” el a bisa. Pero tambe e otro vuelonan for di Europa, mirando cu Hulanda ta keto bay di lock down.

Na e momento aki niun Britanico ta wordo conseha pa biaha te despues di mita di februari. Pero hunto cu Hulanda nan ta e dos paisnan di Europa cu Aruba ta ricibi mas turista. Mirando cu e dos pais aki ta den lock down, e ta bay afecta e recuperacion di nos turismo, minister Oduber a laga sa.

Igualmente el a laga sa cu Organisacion Mundial di Salud (WHO) a informa cu e virus original di Covid-19 ta bay conoce cuater mutacion of variante. Ya caba Inglatera y otro pais na Europa a cuminsa experiencia e prome variante. Minister Dangui Oduber ta spera cu e vacunacion cu ta tumando luga na Inglatera y tambe na Hulanda, cu despues rond di luna di maart, Aruba por cuminsa hopi mas pro activo pa recupera nos turismo for di mercado Europeo.