E impacto di COVID-19 ta central den e deliberacionnan di e Interparlamentair Koninkrijksoverleg, IPKO cu ta cuminza awe. E reunionnan entre delegacionnan Parlamentario di e cuater paisnan di Reino Hulandes ta sucede pa medio digital y lo conclui mañan cu e acto di firmamento di e lista di palabracionnan.
Durante e IPKO digital, delegacionnan Parlamentario di Hulanda, Corsou, St. Maarten y Aruba bao guia di Presidente di Parlamento di Aruba, Juan Ady Thijsen lo discuti temanan cu ta afecta tur e paisnan.
COVID-19 y COHO
E prome sesion ta uno plenario unda cada pais lo duna un presentacion di e desaroyo reciente relaciona cu coronavirus. Despues, Jan Paternotte, den representacion di e delegacion di Staten-General di Hulanda (Parlamento y Senado, Tweede y Eerste Kamer) lo splica e pasonan cu Hulanda mester a tuma pa bringa e contagio di coronavirus y e efectonan denter di Hulanda mes, y lo duna atencion special riba e maneho riba e tereno aki na islanan BES.
Despues di e parti plenario, e gruponan lo keda reparti unda lo discuti e medidanan den cada pais, cua ta e miho practicanan, e cooperacion na nivel di Reino te cu awor, y e posibilidad pa mas cooperacion den futuro. Lo tin tres discusion separa cu tin como enfoke e desaroyonan den e periodo tras di lomba, e perspectiva a corto plaso y e situacion a medio y largo plaso.
Bon Dia Aruba a compronde cu entre e temanan cu ta bay delibera riba dje ta rol di e Organo Caribense pa Reforma y Desaroyo, COHO y e limitacionnan. Parlamentarionan por scoge pa participa na un di e temanan specifico. Tambe lo tin un discusion riba restructuracion y diversificacion di economianan y mercadonan laboral pa yuda fortifica resiliencia economico, pa asina sostene reforma na nivel administrativo, finanzas publico duradero y pa garantisa un mercado laboral fuerte.
Sesion plenario ta publico
E reunionnan lo continua mañan, diahuebs, unda lo tin un ciere plenario publico, unda atrobe lo bolbe pa e gruponan di trabao. Lo por sigui e debate plenario entre e delegacionnan y por sigui esakinan riba e websitenan di Eerste y Tweede Kamer.
Hulanda lo ta representa pa e delegacion di Eerste Kamer, Eric van der Burg (VVD), Annemarie Jorritsma (VVD), Jan Keunen (VVD), Joop Atsma (CDA), Ria Oomen-Ruijten (CDA), Boris Dittrich (D66), Toine Beukering (F-vP), Jeroen Recourt (PvdA), Alexander Van Hattem (PVV), Arda Gerkens (SP) y Paul Rosenmöller (Groenlinks), kende ta Presidente di Comision Fiho Relacion di Reino. E representantenan di Tweede Kamer ta Jan Peternotte (D66), alabes presidente Comision Fiho Relacion di Reino, Attje Kuiken (PvdA), Ronald van Raad (SP), Chris van Dam (CDA), André Bosman (VVD), y Antje Diertens (D66).
Obhetivo di IPKO
IPKO ta tuma luga normalmente dos biaha pa aña, y normalmente, e encuentro na januari ta sucede riba un di e paisnan den Caribe. Staten- Generaal ta organisa e reunion den luna di juni. Pero desde juni y awor tambe a scoge pa reunion pa medio digital pa motibo di e pandemia. IPKO ta un instrumento pa comunicacion directo y encuentro personal entre miembronan di Parlamentonan di Reino. E obhetivo ta cu pa medio di intercambio di informacion y punto di bista, y den deliberacion personal lo por trata y splica temanan cu ta di importancia pa cada pais y asina crea mas comprension pa e posicion di e otro.
Na final di cada deliberacion di IPKO ta stipula un lista di palabracion cu ta keda firma pa lidernan di e delegacionnan, kende ademas tin e tarea pa sigui monitorea e ehecucion di e palabracionnan. Mester bisa cu mayoria informacion a haya pa medio di website di Eerste Kamer di Hulanda. Por ehempel, no tin e lista di e miembronan di delegacion di Aruba poni riba e website di Parlamento di Aruba.
