Pa mita di luna di februari, entre dia 10 pa 15 di e luna aki, Aruba lo ricibi e prome lote di vacuna contra Covid-19 fabrica pa Pfizer-BioNTech cu lo wordo aplica riba nos teritorio.

Nan obhetivo ta pa percura den e prome kwartaal di 2021 pa vacuna mas tanto hende posibel di nos poblacion. “Aruba ya caba ta cla pa ricibi e vacuna,” asina Minister Dangui Oduber di Salubridad Publico a bisa ayera.

No ta conoci cuanto vacuna Hulanda lo bay manda den e prome lote cu por wordo aplica riba nos poblacion mas vulnerabel, entre nan trahado di cuido, nos grandinan interna den cas di cuido, personanan 60 plus y esunnan cu tin malesa di riesgo halto.

E mandatario a bisa cu mas lihe cu nan por vacuna gran parti di nos poblacion, mas lihe nos por bolbe na e normalisa. Den e prome kwartaal Hulanda lo ricibi 8.2 miyon vacuna. E mandatario ta na expectativa cu Aruba lo ricibi ‘algun mil vacuna’ den e prome kwartaal di 2021.

Oduber a duna mas informacion riba e proceso di aplicacion di e vacuna di Pfizer, pero tambe Hulanda lo tin acceso na otro dos vacuna, esta Moderna y Astra Zeneca. Cada vacuna tin su exigencia specifico relaciona entre otro cu temperatura.

P’esey prome cu Aruba ricibi e prome lote di vacuna, nos mester cumpli cu un serie di rekisito cu Hulanda ta exigi riba transportacion, conservacion y aplicacion di e vacuna. Pero ya Hulanda a compromete cu unabes ta haya nan vacunanan, e otro paisnan den Reino tambe lo haya e vacunanan aki, pero prome mester cumpli cu cierto proceso. Por ehempel e vacuna di Pfizer ta trece su reto cune pasobra mester wordo warda na un temperatura di menos 80 grado Celsius. Ya caba e proceso aki ta andando desde comienso di december caba pa ta cla ora e vacunanan ta subi mercado y nos ricibi esaki.

E freezer special lo yega Aruba dia 13 di januari awor. Tambe nos autoridad di Salubridad Publico a entrega un plan di ehecucion di e vacuna na Rijksinstituut voor Volksgezondheid en Milieu (RIVM), tanto pa e prome grupo y tambe ora cu e vacuna lo wordo aplica masivamente. Igualmente nan mester bin cu un campaña di informacion y conscientisacion tocante e beneficio di un vacuna, pero tambe riba e efecto di e vacuna pa tur hende ta consciente di dje.

Despues di esaki Aruba lo ricibi bishita di representantenan di RIVM di Hulanda entre dia 25 y 26 di januari pa haci un control y valida tur preparacion cu Aruba a haci pa ricibi e vacuna. Den opinion di e mandatario, Aruba a cumpli cu tur e rekisitonan pa ricibi e vacuna aki. Si tur cos ta cana segun nan planificacion, mita di februari e prome grupo di persona lo haya e prome dosis di e vacuna aki. Nan ta dos dosis of aplicacion di e vacuna pa asina e persona por keda immuun na e virus aki.

E di dos mester wordo aplica 21 dia despues di e prome vacuna, pa asina despues di shete dia e persona por keda immuun 95% contra e virus di Covid-19. E mandatario a bisa cu Hulanda a compromete su mes pa manda e di dos vacuna di Pfizer. Tambe tin otro vacuna manera esun di Moderna cu mester haya dos dosis. Hulanda a compromete su mes cu unabes nos cuminsa duna e vacuna aki na nos comunidad, nos lo mester tin e suficiente cantidad di vacuna pa duna e di dos dosis, asina e mandatario a sigura.