Den tur actividad humano tin un of mas persona cu ta defini e epoca di cua nan a forma parti. Den baseball na San Nicolas, den e aña nan 1945 – 1960 tabatin hopi cu a sobre sali. Streanan manera “Tenchie’ Hoftijzer y Ruben Phillips a briya den firmamento beisbolistico, pero un pelotero a defini su epoca:No solamente pa locual el a haci como hungado riba tereno, pero tambe pa locual el a haci pa baseball fo’i tereno. Don Juan tabata un colaborado resencial den e preparacion di e buki “Historia Di Baseball Di Aruba’. Na San Nicolas, hendenan di edad grandi, ora cu mi puntra nan si nan ta corda e hungadonan di baseball di e tempo ey, ta nombra Don Juan Perez prome cu tur otro.
Don Juan tabatin un amor enorme pa baseball y un pasion insaciabel pa hung’e. Ya na edad di 13 aña Don Juan a cuminsa hunga baseball cu adultonan. El a organisa un team “Flying Bombs” consistiendo di amigonan cu tabata bon hungado di “bomba” cu kier a hunga baseball, pero no den un liga. Tur diasabra nan tabata forma “scratch matches” contra ekiponan forma pa hungadonan di diferente team den e liga di San Nicolas.
Na 1944 Don Juan a drenta St. Dominicus College na Playa. Aya nan a forma St. Thomas Bond, un club cu tabata practica diferente deporte, incluyendo baseball. Na aña 1945 Don Juan a debuta den e liga di San Nicolas den e team nobo bou nomber di Dodgers, pero e la sigui hunga pa St. Thomas Boys na Playa tambe. Na aña 1950 e Liga di Playa a organisa un campeonato pa prome bes, y St. Tomas Boys, mescos cu Pepsi Cola y Red Rock Cola a haya permiso pa reforsa cu hungado di San Nicolas. Don Juan a busca dos compañe di Dodgers, loke a duna St. Thomas Boys e margen pa titula campeon.
Na San Nicolas, Dodgers, e team di Don Juan tabata gana campeonatonan un aña tras di otro; no solamente pasobra nan tabata practica hopi riba tereno, pero pasobra nan tabata prepara nan mes den teoria di baseball tambe. Tur diahuebs e team tabata reuni pa establece cierto strategia pa e wega di diadomingo. Nan tabata considera e team cu nan lo enfrenta, e batidonan, e tereno cu nan tin di bay hunga ariba y factornan cu lo por afecta e wega. Don Juan tabata hunga un rol grandi den e deliberacionnan. Pa su liderazgo den Dodgers, casi tur aña Don Juan tabata wordo eligi Captain di e team.
Den un encuesta di e corant Amigoe na cuminsamento di aña nan 60, Don Juan a sali den e top dies atletanan di Aruba di tur tempo. Contrario na e deportistanan “all around” cu a haya voto como participante den mas di un sport, Don Juan cu practicamente a hunga baseball so, a sali cu votonan den un solo sport, baseball.
Despues di su tempo, danki na Little Leaue cu a duna chens pa muchanan cuminsa hunga na edad di ocho aña, hopi strea den baseball di Aruba a briya den firmamento,pero den su epoca, no tabatin mucho cu a briya mescos cu Don Juan Perez.
Awe Don Juan Perez, e astro di baseball di su epoca na Aruba ta cumpli 90 aña!Pabien Don Juan, y danki pa tur loke bo a haci pa baseball na Aruba.
1952. Hector Rosario, lider di e delegacion di baseball di Corsou ta otorga e Copa di Amistad, na Don Juan Perez, capitan di e ekipo di Aruba.
1950. Don Juan Perez ta swing pa distancia contra un lanzamiento di e pitcher di Pepsi Cola den un wega di e campeonato di Playa na Aruba Jrs..
1950. Varios bes Don Juan a bay Corsou pa reforsa e ekipo Sithoc den e Campeonato aya. Aki e ta dunando un discurso chikito despues di a ricibi e trofeo den su man pa e victoria contra Lucky Strike di e afamado “Nicho” Hurtado
