Analisis: Covid su impacto riba mercado laboral ta fulminante

Presencia di Covid riba nos isla tabatin un impacto fulminante riba nos mercado laboral.

Di un dia pa otro miles di trahadonan di e sector hotelero sub-contrata via un uitzendbureau a keda totalmente desemplea y sin mas entrada, sino esun di Fondo di Asistencia Social di Emergencia (FASE) cu gobierno a introduci na luna di april pa alivia un poco e situacion aki.

E comerciantenan chikito y independiente of asina ZZP tambe a ricibi e ayudo aki di 959 florin di FASE cu a conoce varios prolongacion y cambio durante su periodo di existencia cu a wordo prolonga recientemente te luna di maart 2021. Net un aña despues cu dia 13 do maart 2020, Aruba a conoce e dos prome caso di Covid importa.

Trahadonan sector priva

Cu un economia deprimi pa varios luna di medidanan severo manera lock down y shelter in place pa contraresta e plamamento di e virus, esaki a conduci cu nos principal industria turistico y tur empresa directo of directamente dependiente di dje, a cuminsa manda trahadonan na cas.

Esunnan cu a sinti’e mas tabata e trahadonan sub-contrata via un uitzendbureau, mayoria di nan di e sector Horeca cu a keda den un limbo laboral te cu awendia. Na luna di april ora cu FASE a drenta na vigor, 10.777 persona a aplica pa ricibi e ayudo aki locual ta nifica un cantidad significativo di nos mercado laboral.

Prome cu Covid a dal nos tabatin un cifra di desempleo rond di un 10%. Pero ironicamente te ainda no ta conoci oficialmente un cifra di desempleo actual. Sinembargo si nos ta analisa e cifra di trahadonan cu a bin hayando ayudo di FASE durante e ultimo lunanan, nos por haya un bista di e magnitud di e problema di desempleo riba nos isla. For di april te cu december 2020 un total di 11.650 persona a ricibi ayudo di FASE pa un total di casi 43 miyon florin paga.

Unabes introduci e subsidio di salario (loonsubsidie) pa sigura mas cupo di trabao posibel, e cifra di trahadonan cu na principio a ricibi ayudo di FASE a cuminsa baha. Unabes cu gobierno a anuncia un proceso di reapertura economico gradual, esaki a duna un tiki di oxigeno na e dunadonan di trabao di e sector priva cu a purba di sobrevivi for di e crisis aki.

Algun sector considera durante e shelter in place como no esencial a cuminsa opera di un forma mas restringi y cumpliendo cu cierto protocol y reglanan di higiena exigi dor di departamento di Salubridad Publico (DVG).

Na luna di juni a lanta e lock down locual a facilita pa cuminsa ricibi inicialmente biahero for di Hulanda y Merca y tambe for di e islanan di nos region Hulandes. E sector di construccion cu ta produci hopi puesto di trabao tambe a wordo reactiva pa medio di cierto estimulo otorga pa medio di e proyectonan fast track. Gobierno a bin cu un serie di exigencia pa medio di DOW pa asina combati e fenomeno di ilegalidad den e sector aki, pero nos por observa cu e fenomeno aki a cuminsa aumenta bek, debi entre otro na e tardansa di otorgamento di permiso di parti di DIMAS.

Tur e proceso di reactivacion economico aki a bira un salba bida laboral pa sigui mantene mas hende na trabao cu ayudo di subsidio di salario otorga pa gobierno via Banco di Seguro Social (SVb). E trahadonan tambe mester a sacrifica parti di nan entrada pa asina por mantene mas puesto di trabao posibel. Pero ainda cantidad di trahado no tin trabao na expectativa di e reactivacion total di nos economia. Na luna di december 3.764 persona a ricibi ayudo di FASE.

Ya caba minister di Labor a premira cu e cantidad di persona sin trabao lo sigui aumenta pa 2021. Gobierno pa medio di minister di Labor, Glenbert Croes y minister di Husticia, Andin Bikker a bin cu un maneho restringi y proteccionista di nos mercado laboral, vooral di e trahadonan cu no mester di un permiso di trabao. Mientras a bin cu restriccion pa e trahado migrante cu mester di permiso.

Recientemente DIMA a anuncia un maneho riba otorgamento y prolongacion di permiso pa trahadonan y profesionalnan di afo. Esaki a base di e recomendacion di un comision conforma pa personal di ambos ministerio cu a bin cu un serie di recomendacion den cuadro pa cuida orden publico y salvaguardia e bienestar en general.

Medidanan cu no a cay den bon tera cerca e trahadonan migrante, pero tambe cerca nan dunado di trabao. Tin e caso di e sector representa pa Aruba Food & Beverage Assciation (AFBA) cu durante 9 luna di pandemia nan no a logra un solo reunion cu e mandatario di labor pa trata aspecto cu nan ta considera importante, pero cu nan ta sinti cu gobierno ta neglisha nan. Tambe nan a pidi reunion cu DPL y DIMAS pa atende cu retonan cu e sector aki tin dilanti, entre otro riba stagnacion di permiso.

Trahadonan di sector publico

Pa e sector publico -aunke no tabatin perdida di puesto di trabao- e ambtenaarnan si mester sacrifica parti di nan salario y tambe di nan beneficionan pa contribui na e fondo di solidaridad. Parti di e situacion aki a surgi debi na e condicionnan cu Hulanda a bin cune pa sigui otorga ayudo financiero den forma di prestamo sin interes na Aruba.

Aunke e ambtenaar ta protegi pa e ley di LMA (Landsverordering Op Materieel Ambtenaren Zaken), nan mester a entrega 12.6% pa contribui cu e fondo di solidaridad. Pero tambe director di empreesa estatal y fundacion mester a haci mesun cos locual a crea cierto disgusto, ya cu no tur compania a cumpli cu e protocol firma.

Di e 25 companianan y instancia estatal cu a wordo pidi pa aporta na FASE, finalmente shete so tabata cumpli cu e fondo di solidaridad, locual a refleha un negligencia di parti di gobierno. Pero e disgusto aki ta continua y ta asina cu trahadonan di empresa estatal y tambe di fundacion no ta dispuesto di sigui sacrifica mas.

Ya caba por ehempel e trahadonan di fundacion SABA cu ta atende cu e casnan di anciano a lansa un advertencia cu nan no ta dispuesto di sigui sacrifica nan bashie premie, despues cu nan a sacrifica dos premier caba, esta reparatie toelage y gelijkbedrag. Nan ta urgi un pronto solucion sino despues di dia 2 di januari, nan lo bini cu un accion mas pisa.

E mesun ambiente di tension laboral ta existi den otro empresanan estatal manera ATA y ANSA, caminda nan empleadonan no ta dispuesto pa sigui sacrifica y nan tin resistencia pa no sigui duna den 2021, entre nan cuater prima na mita: Vakantie Uitkering, bonus, bashi premie, etc… Tambe un 5% riba e salario directo.

Mientras cu gobierno a pidi tur instancia pa entrega igual of mas di loke nan a haci caba den 2020. Dificilmente gobierno por obliga nan, ya cu nan mester firma un acuerdo como e famoso protocol firma 18 di mei 2020 cu no tur a cumpli. Mientras cu Hulanda ta mira e sacrificio aki no mucha pisa, ya cu por ehempel e reduccion di prima ta un biaha pa aña. Mientras cu nan ta prefera di mira e reduccion aki di un forma mas structura. E prome seis luna di 2021 sigur ta mustra uno dificil cu hopi tension laboral tanto den sector publico como priva.