Si tin algo cu algun Arubiano ta gusta ta bebe alcohol y laga e pruebanan atras pa otro haci limpi. E tanki di awa na Sombre no ta un excepcion.
E luga ta conoci como Guadalajara Aruba. Pasobra e ta duna un bista espectacular riba Santa Cruz, Playa y hasta Piedra Plat, Paradera te Noord. Y riba un dia manera ayera, un bon bista riba Venezuela. Esey ta hacie hopi popular cu bishitante.
WEB a dicidi pa instala un heki rond di e tanki, pasobra pa hopi aña tabata pone tur sorto di graffiti. No tur ora tabata arte bunita y apropia pa tur edad. Lamentablemente, no por haci nada pa stroba hende pa sinta bebe y djis benta e resto di sixpacks y otro desperdicio abao, comosifuera ta tarea di otro pa tene e luga limpi.
Mester bisa cu algun decada pasa, importadonan di cerbes a urgi gobierno pa elimina e statiegeld riba cada boter y cu nan lo percura pa tene Aruba limpi. A lanta un fundacion, Fundacion Aruba Limpi cu tabata piki e boternan banda di caminda. Pero e fundacion no tabata un obligacion legal di e importadonan, cu despues di tempo a stop di sostene Fundacion Aruba Limpi. Y e fundacion mes a sigui un tempo, y a hasta pone bakinan di sushi rond Aruba. Pero pa falta di fondo, mester a stop cu e actividad. Y e tristesa ta pa wak con poco balor algun hende tin pa nos isla.
Spera cu 2021, educacion di tur tipo lo haya un enfoke y por cuminza educa cada habitante di e pais aki riba e balor pa tene Aruba limpi.
