Trahado di SABA no ta dispuesto pa sigui entrega mas; No ta acepta pago di bashi premie kitando dianan di ATV

Representante sindical di SEPPA, Rodrigo Tromp, kende ta traha den departamento di vigilante na SABA, a expresa den nomber di e trahadonan dunado di cuido den e cas di anciano.

Nan ta mal contento cu e directiva di e fundacion aki cu a bin cu cierto condicion pa paga nan empleadonan e bashi premie.

Advertencia

Pa demostra nan disgusto, un grupo di trahado cu tabata liber ayera y otronan cu tabata paden di e San Pedro di Verona y St. Michael Paviljoen trahando a participa pasivamente den e accion aki, cu tabata mas tanto un advertencia. E no a stroba e trabao cu nan ta bin realisando. Pero si locual nan a pone riba nan auto tabata: “Nos kier bashi premie”, pa laga nan sa nan disgusto.

Tromp a bisa bon cla cu nan no a stroba pa e trabao sigui pa e biaha aki. Pero e proximo biaha tur trahado ta bay sali afo. Tromp a adverti cu pa e siguiente ocasion tur trahado di SABA lo participa si no ta bin cu solucion den conhunto.

Un di e condicionnan cu a yega cerca e trahadonan ta cu nan lo kier kita entre 6 pa 7 dia di ATV dagen pa asina e trahadonan por haya pago di e bashi premie. Sinembargo nan ta haya cu un tipo di decision asina no mester ta uno unilateral, sino di tur dos banda.

Nan tin un contract colectivo (CAO) vigente y nan ta haya cu unilateralmente dunado di trabao no por bin cu un decision di e caliber aki. “E tin cu sinta cu e trahadonan y yega na un acuerdo”, el a bisa.

Tromp a laga sa cu e trahadonan tin comprension pa e situacion cu nos ta pasando aden pa motibo di e Covid crisis. SABA ta un fundacion y como empleadonan nan mester entrega un parti di nan entrada. Aworaki mirando e situacion cu a surgi rond di pago di bashi premie, mayoria di e trahadonan a opta cu ta preferibel di entrega 5%, en bes di entrega dos premienan.

Proposicion

Tromp a laga sa cu den e ultimo reunion cu e sindicato actual di enfermeronan, ABV a trece dilanti cu SABA kier dos premie, nan ta reparatie toeslag y gelijkbedrag. Of e empleadonan mester scoge pa entrega 5%. “Ta logico cu mayoria di hende ta bisa cu ta entrega un 5%” el a bisa.

Sinembargo aworaki a bin acerca cu si e trahadonan ta kies pa 5%, tambe nan mester entre 6 pa 7 dia di ATV. E trahado no ta di acuerdo cu e proposicion aki. Como trahadonan dos opcion so nan tin pa directiva di SABA pa mantene paz laboral despues cu aña habri. E prome opcion ta pago di e tres mita di e premienan of 5% di e salario. “Ni nada otro. Nos no ta entrega nada mas. Nan no ta bay mishi cu e ATV dagen y no ta mishi cu e vakantie uitkering,” el a bisa.

Representante di SEPPA, Rodrigo Tromp, ta haya cu SABA ta usando sindicato ABV pa ‘laba nan man y laga ABV haci e trabao sushi’. El a splica cu e sindicato aki mester bin cu un reunion ultimo, y nan no a spera cu den e reunion aki mayoria di hende cu a bay ta di SEPPA.

Tromp a compronde cu ABV a keda di papia cu e director di SABA pa wak si ta entrega 6 dia di ATV pa e trahadonan haya e bashi premie. Tromp a sigura cu mayoria di e trahado no ta di acuerdo cu e proposicion aki. SABA tin alrededor di 270 trahado caminda e mayoria absoluto ta cu SEPPA, el a sigura. P’esey el a anuncia cu mayoria di e trahadonan lo participa otro luna den un referendum pa SEPPA bin representa nan bek.

Tromp a laga sa cu e referendum ta poni caba pa dia 15 di januari venidero, ya cu mayoria di trahado ta dispuesto pa pasa pa SEPPA. Pero nan mester warda resultado di e referendum, ya cu ABV no ta acepta esaki, y nan ta prefera di bay referendum hunto cu SEPPA. “Eynan nos lo laga sa cu SEPPA tin mayoria,” el a afirma.

Tromp no por confirma si ta berdad cu dia 31 di december SABA lo paga e bashi premie, pero nan lo kita 6 pa 7 dia di ATV, locual el a ripiti cu e trahadonan no lo acepta esey. E unico opcion cu nan ta pone como trahado ta, mita premienan of 5% di salario.

Mas accion

E grupo di trahado aki no a bin cu un ultimatum. Pero si nan ta spera cu pa cuminsamento di aña, ya sea 1 of 2 di januari, e trahadonan den su mayoria por haya e contesta. “Nos no ta bay duna un ultimatum pa nan pens’e bon,” el a bisa. Si nan no haya un contesta satisfactorio lo bini mas accion.

Igualmente nan tin falta di material pa realisa nan trabao debidamente, pero el a abstene di bay den detaye riba e asunto aki. E grupo di trahado aki ta pidi pa director di SABA tene bon cuenta cu loke nan ta pidi y tambe pa corda cu tin un CAO vigente, y unilateralmente no por tuma niun decision.

Tromp tabata determina pa bisa cu e trahadonan di SABA a colabora cu e dos premienan cu ta e reparatie toelage y gelijkbedrag. E aña aki e trahadonan ta bay colabora sea cu 5% di salario di bashi premie of cu e mita di e premienan. Pero pa otro aña nan no kier tende nada mas.

“Nos no ta bay colabora mas pa otro aña,” el a bisa. El a haci e advertencia aki pa gobierno tene e situacion aki bon na cuenta ya cu ta e dos aña aki so nan a colabora, kiermen e aña aki y e otro aña so.

Otro representante di SEPPA, Mirla Solognier a reforsa loke su colega Rodrigo Tromp a yega di bisa. E trahadonan di SABA a yega di perde dos premie caba pa consecuencia di e Coronavirus crisis. Nan ta consciente cu tur caminda ta pasando den duro, pero nan no kier perde nan derecho, entre nan di nan bashi premie. Como representante sindical e ta boga pa su coleganan, ya cu cada un “tin un cruz pa carga,”el a bisa.

Cada trahadonan tin nan añanan di servicio y semper nan sa di stima nan trabao, caminda nan ta duna full den nan trabao, segun Solognier. P’esey e ta pidi pa tene cuenta pa nan como trahado por haya pago di nan bashi premie. Si nan no por hay’e full sikiera algo di dje.