Desde cu e cantidad di caso activo na Aruba tabata bao di 100 caso den ultimo simannan di november ultimo, por a nota cu keto bay e cantidad di caso activo ta acercando 200.
Dia 25 di november a registra 101 caso activo. Desde e dia ey, poco poco e cantidad di caso activo a keda aumenta, te cu ayera a registra un total di 30 caso nobo di Covid-19 – di cual 3 no ta residente – resultando den un total 173 caso activo. E tasa di positividad tabata hopi halto, na 21 porciento.
Mientras tanto, e cantidad di fayecido relaciona cu Covid-10 na Aruba ta 47.
Sinembargo, esaki no a resulta den un cantidad hopi grandi di hospitalisacion. Hospital Dr. Horacio Oduber a informa cu tin un total di 7 persona interna ayera, di cual 1 tabata den Unidad di Cuido Intensivo y seis tabata isola riba piso general.
DVG a agrega: “Mientras cu otro parti mundo paisnan ta den lockdown aki na Aruba nos por celebra un Pasco cu famia. Ta depende di comportacion di cada uno di nos, si nos lo por celebra un aña nobo tambe sin restriccion. E yamado ta bay na e hoben na e adulto hoben y na e adulto mayor pa sigui cuida. Sea consciente cu covid t’ey. Na Aruba nos tin 173 persona positivo isola pero nos no sa cuanto persona por tin e virus y ta canando rond sin sa cu nan ta transmitiendo esaki pa otro.”
