CEO di Tesla, Elon Musk ta bisa cu tempo atras el a considera bende e fabricante di auto electrico na Apple, pero CEO di e fabricante di iPhone no a atende e reunion.
Den un tweet diamars, Musk a bisa cu el a tuma contacto cu CEO di Apple, Tim Cook, ‘pa discuti e posibilidad pa Apple adkiri Tesla (pa un decimo di nos balor actual). El a nenga di atende e reunion’.
Balor di mercado di Tesla ta $616 biyon.
Musk a bisa cu el a solicita e reunion cu Cook ‘durante e dianan mas scur di e programa Model 3’, un referencia na e prome auto electrico di Tesla diseña pa mercado en masa. Hasta na 2018, Tesla tabata haya problema pa cumpli cu su metanan di produccion di auto y genera ganashi.
E fortuna di Tesla a cambia desde e tempo ey. E fabricante di auto finalmente ta generando placa a base consistente despues di añanan di perdida, y ta continua kibrando record pa entrega di su vehiculonan. Su accionnan a eleva 665% e aña aki so, haciendo e e fabricante di auto mas valioso na mundo y entre e top 10 compania Mericano mas grandi den e S&P 500 index, cual Tesla a drenta dialuna ultimo.
E tweet di Musk a yega despues di reportenan publica cu ta sugeri cu Apple ta trahando pa desaroya su propio vehiculonan electrico. Apple a nenga di comenta.
