Un compania di investigacion di mercado basa na British Virgin Island a revela un grafico mustrando cu Aruba tin e tasa mas halto di casonan di Covid-19 den Caribe, mientras cu St. Kitts tin esun mas abao.
MJS & Associates a revela e Caribbean Update Coronavirus Disease diabierna siman pasa. Ta bisa cu e grafico ta basa riba datonan di 17 di december y ta un comparacion di casonan confirma di Covid-19 per poblacion di 10mil den Caribe, incluyendo miembronan di CARICOM.
Tin 34 pais riba e lista, y St. Kitts ta esun mas abao cu un tasa di 5.06, mientras Aruba ta esun mas ariba cu un tasa di 484.1.
E otro cuatro paisnan entre e cinco mas abao (for di segundo mas abao te cu di cinco) ta Anguilla, Grenada, Cuba y Haiti. E otro cuatro paisnan den e top 5 mas halto (for di di cinco mas halto te cu segundo) ta Saint-Martin, Belize, Sint Maarten y Puerto Rico.
Segun website di e compania, a funda MJS & Associates cu proposito di proporciona investigacion, analytica, servicionan investigativo y di consulta na sector priva y publico consistiendo di banco, impuesto, fraude y accountant forensico, abogado, compania investigativo, investigadornan, cuerponan gubernamental, corporacion y otro stakeholdernan cu e siguransa di privacidad estricto y experticio local.
Te cu diabierna, tabatin 330,001 caso di Covid-19 den Caribe.
