E cosnan bon den bida ta reserva pa e poco nan cu sa con pa sabori’e miho. Raoul tabata un tipo atípico. Nunca e la conforma cu loke ta ordinario. Perfección tabata su pasión den tur cos cu e tabata haci. “Tuma bo tempo y haci e cosnan corectamente of simplemente no hacie.”, el a bisami un biaha ora nos tabata debati encuanto di bai graba e Himno Nacional di nobo den honor di e gobernador saliente di Aruba e tempo ey, Fredis Refunjol ( 2016). Si hopi hende den nos comunidad tabata conoce como un comerciante astuto cu e tabata, pa nos, productornan, creadornan, diseñadornan, artistanan y cantantenan, e tabata e tipo cu tabata “too cool for school” manera un dicho na ingles ta bisa. Simplemente bo no por djies acudi na ne pa busca recurso: bo mester a splic’e con y pakico bo ta bai hacie, y e cu hopi smaak lo discuti cu bo henter e proceso.
Pa subestim’e lo tabata un eror grave si bo tabata conoce of traha cu of p’e. Bo por a pensa cu ela nace na Corsow y cu e no tabatin mucho tempo pa e aprecia nos cultura di Aruba “algun biaha complica”, djies drenta su cas y lo bo ripara di biaha cu e ta un amante ferviente di arte. E pinturanan di difunto y gran artista Padu Del Caribe ta colga hunto cu su coleccion di Salvador Dalí. Na momento cu su señora esposa Landa Henriquez kier a graba su composicionnan cu un orkesta sinfonico di 45 pieza na New York na 2017, Raoul di “no preocupa pa e gastonan”. Mi ta corda cu e director di e studio a bisa mi: “Jonathan, mi ta kere cu e ultimo artista cu a produci na e nivel aki den nos studio tabata hopi tempo pasa su nomber ta Barbra Steisand”.
Tin un cancion Frances cu yama “Le Blues Du Businessman” scirbi pa Luc Plamandon y Michel Berger, cu e cantante Celine Dion a haci famoso den añanan 90. E cancion tabata un grito di un empresario cu a arepinti di un solo cos: di no por a bira artista (cantante, autor, actor of pintor). Hopi bes mi tabata puntra mi mes si Raoul tabata sinti su mes manera e personahe di e cantica aki. Mi ta bisa esaki pasobra e tabatin e habilidad pa papia y elabora riba e vision y e direccion creativo na un nivel y caliber cu por consider’e como un artista di clase mundial.
Pa menciona tur e artistanan cu el a yega di apoya den e decadanan, ta rekeri demasiado pagina pa haci’e y lo demonstra su influencia silencioso. Pero su artista favorito tabata su esposa stima, Landa. Desde conciertonan na su cas pa nan circulo intimo di amigonan, te hasta e scenarionan internacional cu Chichi Peralta, ora Landa tabata creativo, Raoul tabata e productor definitivo. Celine Dion tabatin su Rene Angelil como esposo y productor, y Landa Henriquez tabatin Raoul. Na momento cu Raoul tabata produciendo, e tabata mescos cu un mucha chikito den un tienda di mangel y cos dushi. Disfrutando di e momento y despues e tabata invita bo na un cena elegante pa e sinta rebiba e momentonan cada bes.
Si bo por tabatin e suerte di sinta na mesa cune pa come, e tabata rekeri di bo pa un dosis grandi di debate tocante un variedad di tema, es decir, si John Lennon tabata mihor escritor cu Paul McCarthy, si e biña cu bo tabata bebe tabata bal su prijs of si e politiconan local lo por sobrevivi e scandalnan cu nan ta aden. Lo e criticabo cortesmente y lo e pushabo te na e punto di kier sigura cu bo projecto ta cla pa funciona tanto fiscalmente como creativamente.
Ora mi a informa John Leerdam:
“Raoul Henriquez! E ta mi bon amigo! E ta sostenemi no pasobra mi ta John Leerdam, pero paso cu e sa cu via di Arte y Cultura nos por trece hende di tur nacion hunto. Raoul ta entrega bo tur di dje si bo ta comparti su filosofia comun e ta un ferviente sostenedor di tur produccion riba enscenario den Reino Hulandes. Di Prince Claus!, pa Hoe Duur was de Suiker, pa Changa! Si no tabata pa e sosten di Raoul lo a nifica cu lo no por a duna realse na bo obra di arte.”
E ultimo biaha cu mi a bishit’e na su cas tabata hopi conmovedor. Si físicamente e no tabata mescos cu antes, mentalmente e tabata mes lucido cu semper. Mi a sinta cune y Landa den nan sala y nos a toca e grabacion di e sesion den studio (2017), momentonan cu e tabata duna notanan na mi persona como Oisin O’Malley dirigiendo Landa.
Raoul no tabata solamente un persona cu tabata pensa y sinti creativamente, sino e tabata un motor cu tabata move pa realisanan. ¡ He made things happen! Cu bo gusta esaki of no, e tabata e persona den e sala di reunion cu tabata dicidi e resultado. E tabata crea e Rey.
¡Pa un persona masha confia! Nos ta celebra bo inmenso contribucion na nos cultura, nos hendenan y bo famia.¡Nos ta considera bo semper un Artista manera nos mes!
