Staffunctionaris di SKOA Sra. Lisi Werleman-Paris a laga sa cu nos tin un ley di enseñansa obligatorio (leerplicht). E kier a pone enfasis cu e ley aki ta pa protege e mucha su derecho pa bay scol. Loke si nan ta ripara mas ta cu mayor ta tene nan yiunan na cas.
El a splica cu e ley aki ta specificamente pa preveni esey. “Pa e mayor cumpli pa inscribi su yiu na scol. Y pa e mayor cumpli pa trece nan yiunan na ora scol,” el a declara. Di otro banda e scolnan mester duna loke nan mester duna. Esey den realidad ta e contenido di e ley di enseñansa obligatorio.
P’esey e ta argumenta cu di nan banda ta wordo haci profesionalismo pa por duna un calidad di enseñansa. Nan ta ripara por ehempel cu den scol preparatorio un mucha cu ta haci cuater aña otro aña na september por a cuminsa scol caba na augustus. Sinembargo nan ta ripara frecuentemente cu ora e mucha tin 4 aña y 6 luna, e ora nan mayor ta bin aplica pa un scol.
Sinembargo e aña aki SKOA a habri 3 klas den tres scol piloto unda nan a cuminsa cu alumnonan den kleuter cu no tin cuater aña. Pa ley un alumno mester tin 4 aña pa cuminsa kleuter of cu e ta cumpli 4 prome cu 1 di december.
E aña aki SKOA cu e proyecto piloto aki dunando informacion corecto na Inspeccion di Enseñansa, y hunto cu nan a wordo entrega un plan pa nan bay wak kico ta e beneficionan pa cuminsa cu un alumno cu no tin 4 aña, pero cu e lo por funciona den un kleuter prome cu e ta haci 4 aña.
Pa SKOA ta importante pa wak ki beneficio e posibilidad aki lo por tin, y nan ta sigui monitor e alumnonan cu ta forma parti di e proyecto piloto aki, mirando cu eventualmente e por ta beneficio of no beneficioso. Pero nunca un studio a wordo haci riba esaki y pa e motibo aki como SKOA nan ta purba di ta innovativo riba e tereno aki.
SKOA tin caso di muchanan cu nan mayor ta bin aplica ora cu e mucha tin cu bay scol basico. P’esey pa SKOA ta hopi esencial pa e mayornan ta consciente cu tin un ley di enseñansa obligatorio, caminda e mucha tin obligacion di bay scol si tin cupo pe. Tambe si e tin edad, y si e mucha ta cumpli cu e rekisitonan stipula pa ley, tocante e mucha su edad pa bay scol.
Sra. Werleman-Paris a haci un yamado di parti di SKOA na e mayor pa nan por inscribi online nan yiunan lo mas pronto posibel. Pa haci esaki bo mester bishita e website di SKOA (www.skoa.aw) y aplica. Den caso cu bo tin cualkier problema bo por tuma contacto cu SKOA via nan Facebook-page, unda nan tin un video cortico cu ta indica con pa haci inscripcion pa asina brinda bo yiu e derecho di enseñansa.
