Polis di Peru a comete “cantidad di abuso” contra manifestantenan, den su mayoria pacifico, mientras nan tabata protesta pa “altamente cuestionabel retiro” di e presidente na e momento ey Martin Vizcarra na november ultimo, e organisacion Human Rights Watch a bisa diahuebs ultimo.
E grupo cu sede na New York a afirma den un rapport riba e protestanan cu e presidente interino Francisco Sagasti, Congreso y polis mester promove un reforma pa garantisa cu agentenan lo respeta e derecho di reunion pacifico.
Un solicitud di comentarionan cu a wordo manda na Ministerio di Interior di Peru no a ricibi un contesta mesora. E minister di e cartera, Jose Elice, tabata di biahe na sur di e pais.
Dos hoben a muri y mas di 200 a resulta herida, algun di nan di gravedad, den e manifestacionnan entre 9 y 15 di november ultimo, segun Human Rights Watch a bisa den un comunicado.
“E declaracion di testigonan y otro prueba pa lo cual Human Rights Watch a haya acceso ta indica cu polis a emplea, varios biaha, forsa excesivo contra manifestantenan”, a indica. Evidencia ta inclui videonan cu ta mustra polis tira gas lagrimogeno directamente na e multitud, a bisa.
Asina mes, evidencia ta indica di un solido y creibel manera cu polis a usa scopet caliber 12 pa tira perdigon di plomo y balanan di glas, den violacion di nan mesun protocolnan, cu ta prohibi e uso di a municion aki, a agrega.
“Presidente Sagasti a duna un importante paso ora a convoca un comision pa mehora e practica policial. Awor su gobierno mester ta lider di esfuersonan pa impedi cu lo comete abuso contra manifestantenan pacifico di parti di e mesun polis cu mester protege nan”, e director di HRW pa America, Jose Miguel Vivanco, a bisa den un comunicado.
Gobierno Peruano a anuncia diaranson ultimo e creacion di un comision multisectorial cu lo propone accionnan na fabor di e victimanan durante protestanan di november.
