Papa Francisco a reuni cu Santos y Uribe, y a invitanan pa dialoga na Colombia

Papa Francisco a ricibi na Vaticano presidente di Colombia Juan Manuel Santos y ex-presidente Alvaro Uribe, den un reunion unda nan a papia tocante e acuerdo di paz, cu gobierno di Colombia a firma hunto cu guerrilla FARC dia 24 di november cu a pasa. E acuerdo a ricibi apoyo di banda di gobierno y a ser rechasa pa grupo di oposicion.

“Su Santidad a duna nos un invitacion pa un dialogo. Mi ta un di nan cu a vota dia 2 di october pa e opcion di No. Nos kier paz pero nos tin hopi cos cu nos no a logra den un acuerdo”, Uribe a bisa na momento di su salida di e dialogo.

Mi a a splica nos preocupacion. Despues cu e opcion di No a gana, nos tabatin dialogo y modificacion cu nos a acepta, pero nos tin hopi tema cu nos mester discuti, cu ta tema hopi delicado y cu e gobierno no kier a modifica.

Mi a pidi Santos mas apertura dilanti di Papa Francisco, Uribe a bisa.

Senador Uribe ta un di e opositornan mas den desacuerdo cu e acuerdo cu a firma na Habana, y cu despues e pueblo di Colombia a rechasa den un plesbicito dia 2 di october.

Dianan despues e acuerdo a ser firma di nobo y a ser ratifica pa Congreso y Corte Constitucional di Colombia .