Mayornan preocupa cu carta di Colegio Arubano: “No por keda sinta y mester bay otro tipo di scol”

Mayornan preocupa di alumnonan na Colegio Arubano a acerca redaccion di Bon Dia Aruba despues di a haya un carta di directiva di e scol, fecha 10 di december 2020, den cual ta anuncia entre otro e maneho imponi pa ministro encarga cu enseñanza, cu ta establece cu ningun alumno por keda sinta. Loke en principio e formulacion no ta revela, cu parti di e maneho ta cu ora un alumno no alcanza e nivel cu ta dun’e acceso automatico na e siguiente aña, e por hay’e den e situacion cu ta oblig’e di cambia pa un scol di menor rango. Asina un alumno di VWO ta obliga di sigui na mesun scol, pero mester cambia pa HAVO, loke no ta cuadra cu su aspiracion personal, cu ta di logra un diploma di VWO, pasobra e kier sigui un estudio pa cual e diploma di VWO ta un requisito.

Segun e carta di e scol, ministro encarga cu enseñanza a dicidi aña pasa cu mester elimina e fenomeno d ‘keda sinta’. Esaki no ta implica cu alumnonan por avanza sin mas pa e siguiente aña. Un alumno cu no por avanza (na e mesun tipo di scol; red.), por bay un siguiente aña, pero na un scol di nivel mas abao. Por ehemplo, un alumno di VWO-3 no por avanza pa VWO4, pero segun e maneho nobo di e ministro no por keda sinta den VWO-3, a menos cu tin motibo di peso pa esey. Kico ta e motibonan di peso no ta menciona explicitamente. Mayornan di alumnonan cu na fin di aña escolar ta di opinion cu tin motibo di peso pa nan yiu, cu no a ‘bay over’, keda sinta toch, por entrega un peticion cerca e scol. Lo evalua tur peticion di manera serio, segun e carta firma pa rector di Colegio Arubano. E carta ta menciona tambe cu alumnonan cu ta den examenklas si tin e derecho di haci e aña ey pa di dos biaha si nan no logra.

En general sa sucede mas biaha cu un alumno ta opta pa un scol di menor grado pa por logra un diploma, pero ta parce cu no ta tumando na cuenta cu e aña aki tabata un aña excepcional den cual e crisis causa pa Covid-19 a pone mundo na rudia. Esaki tabatin bastante consecuencia tambe pa enseñanza, unda na tur nivel muchanan a cay atras, sin cu nan tabatin acceso na ayudo adecuado di enseñanza online. For di varios mayor redaccion a ricibi e comentario cu no tur scol, y den cierto caso, no ta tur docente tabata mes activo den prepara material pa online pa nan alumnonan. Cu e consecuencia cu den cierto caso alumnonan no a ‘perform’ malo pa tur vak, pero specialmente pa e vaknan unda e docentenan a faya den duna e apoyo necesario. Si esaki ta e caso anto ta logico cu ta spera di e scol pa carga responsabilidad pa e falta di control aki, riba kico nan docentenan a haci durante e periodo di crisis, cu a resulta den menor prestacion despues cu scolnan a habri atrobe.

Tambe durante e lockdown unda cu solamente enseñanza for di distancia tabata posible, redaccion di Bon Dia Aruba tabata haya varios denuncia cu tabatin docente cu solamente tabata ripiti e mesun materia cada vez atrobe, loke tabatin e alumnonan disgusta y sin gana di traha na cierto momento. No den tur caso tabatin un intento planifica pa compensa e tempo y conocimento perdi na un manera structura. Tur esey tabatin influencia riba prestacion escolar di hopi mucha, banda di otro factor cu ta hunga un papel den tur esaki. E preocupacion di e mayornan ta cu no ta tene suficiente cuenta cu e crisis y su efectonan, tampoco riba funcionamento di e scolnan mes.