“Recuperacion di industria turistico di Aruba ta depende di varios factor, pero uno importante ta comportamento y pasonan cu comunidad di Aruba mes ta tuma pa tene e contagio di coronavirus bao control.”

Asina Director di ATA Ronella Croes a bisa Bon Dia Aruba ayera. “Nos a mira kico a sucede na september, ora cu e brote di Covid-19 no solamente a afecta hopi hende na Aruba, sino cu e tabatin su efecto riba e grado di recuperacion di turismo.” Manera ta conoci, e cantidad di turista cu a scoge pa bin Aruba durante e pandemia a cay na cero durante luna di april y mei, pero unavez Aruba a habri su fronteranan na juni, e cifranan a cuminza aumenta, y hasta mas cu a proyecta. Pero e crecemento proyecta a para ora cu memey di comunidad a bin un contagio enorme di COVID-19.

Pa loke ta e turistanan mes, e virus ta bao control y e protocolnan ta traha. “Locual nos ta experiencia si, ta esnan cu mester pone nan informacion di e testnan cu nan a haci riba e sistema. Tin biaha e no ta logra na tempo y e ora ta yega aki sin un resultado.” Manera ta conoci, si no tin un resultado negativo, no ta permiti hende drenta Aruba. Y e ora mester haci un test na Aruba.

Contagio abao entre turista

Sinembargo, na luna di november Aruba a logra un cantidad di casi 30 mil turista, y unicamente 14 a test positivo. Consecuentemente e seguro cu Aruba ta ofrece na turistanan tambe a funciona bon. Tur cu a test positivo a bay keda na lugarnan cu a scoge adelanta pa por acomoda personanan cu a test positivo, y ATA a lanta su propio servicio di concierge. “Nos concierge ta percura pa yuda e turista cu a test positivo pa por haya e servicionnan necesario.

Y aunke cu algun logicamente no ta contento cu nan a test positivo – ta ken ta contento di un resultado positivo di Covid19- , toch mester bisa cu en general nan ta satisfecho cu e trato cu nan ta ricibi.” E director di ATA a bisa cu contrario na un solo pacient Mericano, cu a bira parti di noticia na Merca ora cu el a bolbe haciendo uso di un air ambulance, tur otro a keda Aruba pa pasa e proceso di infeccion. Pues, ATA ta contento con e protocol di Covid-19 ta trahando.

PCR demasiado caro

Den su conseho e Outbreak Management Team di RIVM, OMT, cu ta conseha Aruba tambe, a bisa cu ta ora pa Aruba cuminza sigui e desaroyo di e rapid testnan. Motibo ta cu e PCR, cu aunke e ta considera e ‘Golden Standard,’ esun mas confiable, ta caro y ta tuma mas tempo pa haya resultado. Manera ta conoci, na Aruba e ta tuma como 12 ora of hasta mas pa haya un resultado. OMT ta kere cu pa yuda cu e fluho di turista, sin cu mester crea un infrastructura mas caro, lo ta bon pa asina cu e asina yama rapid tests ta mas confiable, pa Aruba haci uso di nan, sigur pa turistanan cu a mustra caba di tin un prevalencia abao den infeccion.

“E decisionnan ey, sinembargo, ta keda den man di DVG,” Ronella Croes a bisa. “E ta algo cu nan mester evalua hunto cu OMT. Mientras tanto nos tin cu percura cu e protocolnan pa percura cu tin menos contagio ta para fuerte. Pero unavez cu nan ta bisa cu e rapid testnan ta confiabel, sigur lo mester considera nan.”

Y motibo pakico mester sigui considera test y mantencion di e protocolnan mas estricto posibel ta cu e proceso di vacunacion lo no sucede mesora. Aruba lo haya e prome vacunanan na januari y tin un secuencia programa ken lo haya e vacuna prome. Pues, e virus lo no desaparece. Y mester sigui actua cu cautela pa no plama esaki. E mesun storia ta conta pa e mercado principal di Aruba cu ta Merca, cu awor aki un biaha mas ta experienciando un ola fuerte di contagio cu e coronavirus, cu tur su consecuencianan.

Cu otro palabra, e hecho cu tin un vacuna awor no ta un panacea pa e crisis. E crisis lo sigui fuerte hasta na 2021, te ora cu gran parti di poblacion na Aruba, pero tambe den e mercadonan mas importante di turismo di Aruba por keda vacuna. Di otro banda, te asina leu, Aruba lo no pone como exigencia cu un persona ta vacuna pa por drenta nos fronteranan.

Outbreaks

Ayera Hulanda a anuncia medidanan stringente pa su comunidad, y aunke no a bin un prohibicion di biahe, Gobierno no ta recomenda Hulandesnan pa biaha. E mercado di Hulanda ta uno importante pa Aruba y net awor cu nos a subi pa Code Geel ta bin e paso aki di Gobierno Hulandes. Sinembargo ATA ta tene cuenta si cu kizas tin hopi hende cu simplemente kier scapa di e situacion y Aruba lo por brinda e opcion mas sigur aki. Pasobra ya caba a demostra cu e Health and Happiness Code ta trahando. E cantidad di contagio memey di turistanan ta poco.

“Hopi turista ta bin di lugarnan unda tin protocolnan estricto y nan ta sigui nan. Y como tal, ta acepta e requisitonan cu Aruba a pone pa percura cu no tin contagio. Pues Aruba ta considera hopi sigur pa e turistanan cu ta bin.” Mesun cos ta conta pa Merca. Ayera e cantidad di morto di Covid-19 a surpasa 300 mil y e estadonan di New York, Massachusetts y New Jersey cu ta mercadonan principal pa Aruba ta tumando medidanan pisa na cas tambe. Pero tin señalnan si cu si Aruba por mantene su propio contagio abao y tur hende mantene nan mes na protocolnan, e isla lo sigui ta atractivo pa turista cu segun nan propio testimonio ta sinti nan mes sigur na Aruba.

Impacto

E impacto di coronavirus y e pandemia sinembargo lo keda visto pa hopi tempo. E Average Daily Rate, ADR, di hotelnan a baha como 13 porciento y aunke e Director di ATA no a menciona e Revpar pa e aña aki, e ta bisa cu e impacto di e virus lo sigui te 2021. Ta premira cu pa fin di 2021 lo tin un recuperacion parcial compara cu 2019, pero “e ta un recuperacion.” E expectativa pa December, mirando e control di e contagio na Aruba tabata hopi positivo, particularmente pasobra e fronteranan cu mercadonan Latinoamericano tambe a habri.

Pero ta cuestion di mira con e desaroyo di coronavirus na e paisnan Merca y Hulanda lo impacta e proyeccionnan pa Aruba.

Rating

En todo caso, Aruba ta goza di un bon evaluacion di turistanan. ATA ta analisa tur comentario cu Aruba ta ricibi riba e diferente plataformanan, incluso Tripadvisor, pero tambe medionan social y si prome cu Covid-19 nos pais tabata ricibi un average di 8, e cifra a mehora pa un 9 of hasta mas, durante e crisis aki. E forma con Aruba ta atende e casonan y e turistanan, e pasonan cu ta tuma pa proteha nan ta visto y turistanan ta aprecia esaki, segun Director di ATA.

Airbnb

Un otro fenomeno importante ta e uso di asina yama acomodacion alternativo cu no ta hotel. A nota cu casi 25 porciento di turista cu a bin Aruba a bay keda sea na airbnb’s, casnan cu nan a huur, of condominio. Pero tur tambe mester cumpli cu e mesun exigencia di e Health and Happiness Code y consecuentemente e reaccion di e turistanan ta positivo tambe. E responsabilidad ta den man individual, esta di e propio doñonan nan mes cu ta depende di un bon ‘review’ pa por sigui haya bishitante. Pues e control di e propio cliente ta sumamente importante y te awor e ta mustra cu e ta trahando bon. E comentarionan pa e acomodacionnan otro cu hotelnan ta positivo, tambe.

Responsabilidad mutuo

Cu otro palabra, Aruba ta haci bon entre e turistanan cu ta bin. E crecemento di turismo sinembargo lo depende di otro factor, manera e contagio na cas, y e forma con pa controla esaki. Ademas di e forma con nan mes ta sigui e protocolnan cu a pone pa por bishita nos pais. E meta ta pa crea un balance entre crecemento turistico y salud general, di comunidad di Aruba y di e turistanan. Pero pa logra esey, ATA mester por conta riba e propio individuonan, e turista y e local, cu nan ta cumpli cu e protocolnan pa evita contagio di Covid-19, cu no ta bay desaparece pa e proximo lunanan.