Deborah van den Berg-Alexander y Alvin Molina miembronan di Kiwanis Club of San Nicolas a duna un entrevista special pa Bon Dia Aruba y asina trece dilanti nan proyectonan como club y e fundraising cu tin aworaki pa nan haya fondonan y por yuda mas e comunidad di San Nicolas.

Molina cu tin e funcion di presidente a splica cu Kiwanis of San Nicolas a cuminsa aña pasa cu e vision cu area di San Nicolas ta merece mas atencion di clubnan di servicio, pa algun motibo el a sigura cu San Nicolas no tabata hayando suficiente atencion, mientras cu “lamentablemente e ta merece y mester di hopi atencion pasobra tin necesidad grandi eynan”, Molina a bisa.

Pe a motibo aki, San Nicolas a haya su mesun Kiwanis Club cu ayudo di distinguido teniente gobernador Giantonio Muller, distinguido presidente Edalitza Weller y full club Kiwanis di Aruba pa yega na un club pa San Nicolas.

21 di januari di e aña aki, segun Molina a destaca e club aki a wordo instala cu 25 miembro na e momento ey y tur di nan tabata biba, traha, crece of tabatin un afinidad cu e area y cu tambe tabatin e gana pa traha pa comunidad “pero specialmente pa muchanan den nos comunidad” Molina a expresa.

“E ta necesario, pero e ta crea speransa ora bo por wak cuanto hende ta willing y capaz pa traha pa comunidad” tambe Molina a comenta.

Despues cu nan a cuminsa, Covid-19 a yega na Aruba y nan tabatin yen idea y proyectonan cu muchanan “cu mester a pone den frigidaire un rato” vooral pa distancia social, pero cu nan tabata un club nobo cu no tabatin presupuesto y cu miembronan por a usa nan creatividad pa haci algo y no sinta keto y haci nada pa comunidad.

Di e manera aki, el a sigura cu varios proyecto online a bin dilanti cu muchanan por haya entretenimento door cu nan tabata den cas pa via di medidanan implementa pa pandemia y educa nan den diferente manera como baile, cushina, traha cos cu man, nan tabatin fundraising tambe como un campamento di zomer na juli, entre otro.

Di loke ta trata e aña 2021, Molina a conta cu e aña di Kiwanis ta cuminsa na october te september di otro aña, aworaki nan ta den su di dos termino como hunta directiva y nan tin yen plan pa proyectonan e aña aki pero nan a ripara cu esey ta bay rekeri di un presupuesto y pa nan por logra esey nan mester sigui cu nan fundraising.

Di mesun manera, el a meciona cu e club ta sirbi e muchanan y yuda nan como por ehemplo cu ‘Back to School’ na unda nan ta haya uniforme, pañanan, articulonan di scol, etc y nan como Kiwanis San Nicolas a pensa cu nan kier haci algo extra di esey, nan kier enfoca riba ‘mentorship’ y cu esey nan no kier solamente duna muchanan articulonan sino cu tambe kier educa nan, pa despues nan por yega na nan cosnan nan mes.

“Esey ta un cos cu nos kier involucra den tur nos actividadnan y proyectonan pa duna algo di educacion, formacion den e mucha hunto cu profesionalnan pa forma e muchanan di tur sorto di manera pa nan por sirbi comunidad na nan manera” Molina a destaca.

Manera Molina a menciona nan ta un grupo di San Nicolas y e risico ta cu nan ta bay pensa pa sa precies kico e area aki mester, pero nan a bin cu un comision cu un plan di e cual e comision aki ta bezig ta haciendo un investigacion di kico exactamente ta e necesidadnan di e comunidad aki, nan ta papiando cu tur sorto di profesionalnan, companianan y famianan pa puntra nan y haya sa kico ta e necesidadnan.

“Nos ta bay filtra for di esey kico nos como club di servicio di San Nicolas lo por aporta na dje”, Molina a sigura.

Deborah van den Berg-Alexander director di Fundraising cu a nace y crece na San Nicolas a specifica cu nan ta purbando di trece tur hende hunto y profesionalnan pa hende por wak cu San Nicolas tin hende prepara “tin personanan cu ta lubida kico tur San Nicolas a produci y cuanto potencial tin pariba di brug”, el a expresa.

Ademas, van den Berg-Alexander a duna di conoce e fundraising cu nan tin na e momentonan aki yama ‘Unsung Heroes’ cu ta trata di un calendario cu segun el a sigura, ta trata di un capricho di seis siman atras na unda nan kier a haci algo dibertido cu personanan cu merece ta den calendario como frontliners door di pandemia Covid-19, ademas di otro grupo mas grandi di e cual van den Berg-Alexander a expresa cu a zorg pa tur cos sigui.

Un homenahe pa assistent di dokter, polisnan, specialistanan di hospital, personanan cu ta haci limpi cu ora Covid a drenta na maart tur hende mester tin nan cosnan limpi pa evita un infeccion di Covid-19, asina como tambe hendenan di botica, trahadonan di funeraria, chauffeur di ambulancenan, entre otro cu a pone nan bida y nan curason den nan trabou den temporada aki.

“Nos kier haci enfasis pa nan, pa nan wordo reconoce y door di cumpra e calendario nos ta duna comunidad bek”, van den Berg-Alexander a manifesta.

Pa e benta di e calendario nan kier recauda fondonan pa nan por sigui cu nan proyectonan y cu nan a haya ayudo di diferente sponsor ademas di conta cu e participacion di Jesse Rasmijn como diseñador y fotografo.

Personanan interesa pa adkiri e calendario por tuma contacto cu nan mediante nan Facebook page Kiwanis of San Nicolas of via telefon 568.7256, esey tin un costo di 25 florin.