Ayera mainta durante un conferencia di prensa di Fundacion “Mi Voz ta bo Voz” a trece dilanti un situacion delicado pa loke tin di haci cu ayudo pa muchanan y personanan special, cu mester di productonan como ‘Pediasure of Ensure’ pa nan bida diario, y cu no tin e recursonan necesario pa nan abastecemento door di nan situacion economico.

Lissete Gomez di Fundacion “Mi Voz ta bo Voz” a anuncia cu e aña aki nan a haya varios ciudadano cu a acerca na nan fundacion pa ayudo riba alimentacion pa diferente mucha menor y dos adulto tambe, cu den nan bida diario ta haci uso di producto nutricional como ‘Pediasure of Ensure’. Di esaki el a menciona cu nan a haya ayudo di comerciantenan y comunidad na luna di mei pa por surti e famia aki te cu december, pero e luna aki a yega y te ainda no por haya un solucion pa e situacion cu e famia aki ta bibando.

Nan como fundacion ta haci un yamado pa comunidad pa pidi ayudo, aunke manera tur hende sa e situacion na e momentonan aki ta sumamente dificil door di Covid-19, pero “no por laga e muchanan aki sigui pasa den e situacion aki, nan tin derecho”, Gomez a señala.

Pa e motibo ey, el a bisa cu nan ta canando hunto cu otro fundacionnan y tambe mayornan di e muchanan e caminda pa busca ayudo oficial cerca AZV directamente, pero tambe cerca minister di Salubridad Dangui Oduber. Como fundacion nan a entrega un carta pa nan ayera diahuebs.

Segun loke Gomez a manifesta, nan a compronde cu AZV a stop di duna e producto nutricional na un grupo di mas o menos 30 persona, segun loke el a splica y cu esey a trece consecuencianan negativo, ya cu nan tin mayornan cu entre otro ta cobra salario minimo y otronan cu door di Covid-19 a perde nan trabou.

“E gastonan aki ta rond di 600 florin pa luna”, Gomez a declara.

Tambe a duna di conoce cu algun di nan mester di minimo 4 producto di e sorto aki pa dia, cada tres of cuatro dia nan ta usa un caha cu tin un balor di 85 florin lo cual ta representa un carga hopi pisa, pero esaki ta regarda pa muchanan special cu 7 di nan ta bebe esaki via slang cu e condicion sensibel cu no por guli y no por come un otro alimentacion, un so di nan ta bebe via oral.

Ta p’esey nan ta haci un yamada pa comunidad di Aruba pa haya un ayudo, pa lo cual por cu por duna pa nan na e momentonan aki mientras tanto nan ta wardando riba un solucion permanente y despues na uno definitivo cu AZV pa wak ki ayudo nan por brinda pa e muchanan aki.

Di mesun manera, el a declara cu nan tin e condicion di special pa motibo cu nan ta den un estado vegetativo of nan ta riba cama 24 ora, cu poco movecion. Algun di nan por bay na un centro di cuido of scol pero otro mester di cuido na cas 24ora, 7 dia di pa siman.

Asina mes, Gomez a splica cu na e momentonan aki nan ta bay cuminsa haci contacto cu Fundacion Pa Nos Comunidad, Cruz Cora a yuda nan na luna di mei ultimo cu un caha y nan lo haci contacto bek pa wak si nan por yuda e famia un biaha mas cu segun Gomez a specifica “esaki ta un emergencia pasobra e productonan ta cabando”.

“Nos wardando confirmacion di minister Oduber y AZV pa haya un posibel solucion pa e famia aki por haya un ayudo” Gomez a comenta.

Di otro banda, Bon Dia Aruba a tuma contacto cu Solange Tchong vocero di AZV y el a splica cu na e momentonan aki e maneho di AZV ta asina cu bou pakete di AZV pa loke ta trata cobertura di nutricion of alimentacion ta cay como cuido propio, responsabilidad di e persona mes y esey ta e motibo pa cual bou di AZV esey no ta wordo incorpora.

“E echo cu un persona mester di un lechi of un bebida special, esey no ta cay bou AZV”, Tchong a sigura.

Tambe el a manifesta cu pa hopi biaha ta existi caso di hende muhe cu a haya yiu y cu tin e opcion di duna lechi di pecho of formula pa nan yiu, esaki ta cay como alimentacion of nutricion pero cu no ta cay den e cobertura di seguro medico.

Tchong a splica cu e situacion ta crea impresion cu e productonan nutricional aki ta un remedi pero esey no ta e caso y esey ta hustamente e pakico no ta cay den cobertura di AZV pa loke ta trata nutricion y alimentacion.

Si algun persona of compania lo kier haci un donacion pa e famia aki, por tuma contacto na number 5629820 di Fundacion “Mi Voz ta bo Voz”.