Gobierno Mericano y 48 estado y districto a demanda Facebook ayera, acusando e di abusa su poder di mercado den rednan social pa caba cu competidornan mas chikito, y buscando remedionan cu por inclui un separacion forsa di e servicionan di mensahe Instagram y WhatsApp di e red.

E demandanan anticompetencia, anuncia pa Comision Federal di Comercio (FTC na Ingles) y Procurador General di New York, Letitia James, ta marca e segundo ofensiva mayor di gobierno e aña aki contra e aparentemente intocabel behemoth di tecnologia. Departamento di Husticia a demanda Google na october pa abusa di su dominio di buskeda y aviso online – e intento mas significante di gobierno pa reforsa competencia desde su caso historico contra Microsoft dos decada atras. Amazon y Apple tambe ta bao investigacion den Congreso y di autoridadnan federal pa supuesto conducta anti-competitivo.

James a nota na un conferencia di prensa cu ‘ta realmente criticamente importante pa nos blokea e adkisicion predatorio aki di companianan, y restaura confiansa den e mercado’.

FTC a bisa cu Facebook a practica un ‘strategia sistemico’ pa elimina competencia, incluyendo door di cumpra rivalnan chikito emergente manera Instagram na 2012 y WhatsApp na 2014. James a echo esaki den su conferencia di prensa anterior, bisando cu Facebook a ‘usa su poder di monopolio pa caba cu rivalnan chikito y elimina competencia, tur na costo di usuarionan comun’.

FTC a multa Facebook $5 biyon na 2019 pa violacionnan di privacidad y a institui vigilancia y restriccionnan nobo riba su negoshi. E multa tabata esun di mas grandi cu e agencia a yega di duna un compania tecnologico, maske no tabatin impacto visibel riba negoshi di Facebook.

Facebook a yama e accionnan di gobierno ‘historia revisionista’ cu ta castiga negoshinan exitoso, y a nota cu FTC a aproba e adkisicionnan di Instagram y WhatsApp añanan atras.
“Gobierno awo kier hala atras, mandando un advertencia aterador na negoshinan Mericano cu ningun benta ta final”, consehero general di Facebook, Jennifer Newstead a bisa den un declaracion cu ta echo e respuesta di e compania den un investigacion recien den Congreso.

Facebook ta e red social mas grandi di mundo cu 2.7 biyon usuario y un compania cu un balor den mercado di casi $800 biyon, cu su CEO Mark Zuckerberg e di cinco individuo mas rico di mundo y e cara mas publico di e ‘swagger’ di Big Tech.

James a acusa Facebook di tin un practica di habri su pagina na desaroyadornan di app terceros, y despues abruptamente exclui desaroyadornan cu ta mira como un menasa. E demanda – cu ta inclui 46 estado, Guam y Districto di Columbia – ta acusa Facebook di conducta anti-competitivo y di usa su dominio di mercado pa cosecha data di consumidor y gana un fortuna den aviso.

Procurador General di North Carolina, Josh Stein, kende tabata den e comite ehecutivo di Procurador General conduciendo e investigacion, a bisa cu e litigacion tin potencial di altera e horizonte di comunicacion den mesun forma cu e kibramento di monopolio di servicio di telefon local di AT&T a haci na añanan 1980.

“Nos speransa ta pa restructura e mercado di rednan social na Merca, y actualmente tin solamente un hungado”, Stein a bisa den un comunicado di prensa. El a bisa cu e coalicion a traha colaborativamente cu FTC pero a nota cu Procuradornan General a ehecuta nan propio investigacion separa.

Experto anti-competencia Rebecca Allensworth, un profesor di ley na Vanderbilt University, a bisa cu ta ‘dificil pa gana cualkier demanda anti-competencia y esaki no ta diferente’. Pero pa loke ta casonan anti-confiansa, el a agrega cu gobierno su caso ta fuerte.

Demanda di Departamento di Husticia contra Google, anuncia apenas dos siman prome cu eleccion, a trece acusacion di motivacion politico. E demanda a ser entrega pa un agencia di gabinete encabesa pa un Procurador General mira como un aliado cercano di presidente Donald Trump, kende frecuente- y publicamente a critica Google.

FTC, den contraste, ta un agencia regulatorio independiente, kende su cinco comisionado ta inclui actualmente tres Repulicano y dos Democrata.

Presidente electo Joe Biden a bisa cu mester considera seriamente e kibramento di gigantenan di Big Tech. El a señala Zuckerberg yamando e ‘un berdadero problema’.

Instagram y WhatsApp ta entre alrededor di 70 compania cu Facebook a adkiri durante ultimo 15 aña. Pero nan ta esunnan mas frecuentemente nota pa criticonan di Facebook como propiedadnan cu mester ta separa.

Facebook a paga $1 biyon pa Instagram, reforsando e negoshi di e red social un luna prome cu su stock a bira publico. E tempo aya, e app di potret tabatin alrededor di 30 miyon usuario y no tabata produciendo ganashi. Algun aña despues, Facebook a adkiri WhatsApp, un servicio di mensahe cifra, pa $19 biyon.

Zuckerberg a priminti cu ambos compania lo core independientemente, pero durante aanan e servicionan a bira cada bes mas integra. Usuarionan awo por vincula cuentanan y comparti contenido entre e plataformanan. Instagram awo tin mas di 1 biyon usuario rond mundo. Integracion asina por hacie mas dificil pa separa e companianan.

Net Choice, un asociacion comercial di Washington cu ta inclui Facebook como miembro, rapidamente a critica e demandanan. E caso pa cumplimento anti-competencia contra Facebook ‘nunca tabata mas zwak’, vice-presidente di NetChoice, Carl Szabo a bisa den un declaracion, mustrando riba servicionan social nobo manera TikTok y Snapchat como rivalnan cu por ‘surpasa’ plataformanan mas bieu.

“E demandanan aki ta marca un punto importante den e bataya pa controla monopolionan di Big Tech y reinvigora cumplimento anti-compentencia”, segun Alex Harman, defensor di politica di competencia pa Public Citizen, un grupo defensor di consumidor.