Un fenomeno cu semper a existi, pero cu ultimo tempo a haya mas forsa, despues cu Crisis Team a introduci un serie di medida pa contraresta e plamamento di Covid-19, ta e fiestanan clandestino.
Gobierno ta consciente di e situacion aki. Minister Presidente, Evelyn Wever-Croes a referi durante su ultimo conferencia di prensa na dje, caminda el a lamenta cu tin ‘ciudadanonan cu ta insisti pa keda haci fiesta clandestino’. Ya cu fiesta comercial ta bende ticket, ta prohibi actualmente. Sinembargo tin hende cu ta organisa fiesta comercial consciente cu esaki no mag.
Sinembargo el a splica cu si un hende ta haci aña y e ta invita un grupo di hende pa celebra den nan cura di cas, polis no por drenta pasobra e ta contra di privacidad. Asina leu nos regulacion di calamidad pa maneha e situacion di Covid actual no ta bay contra privacidad di hende. E unico caminda ta esun di bin cu un ley excepcional aplicabel casi den situacion di guera, caminda e ley ta permiti di bay mucho mas leu. Pero esaki no ta e caso aworaki.
Pero -segun e mandatario- nan no ta haci esey, pasobra gobierno no tin e base legal pa hacie tampoco. “Y nos no kier bay mete den bo privacidad di bo hogar tampoco,” el a bisa
Premier Wever-Croes ta prefera di urgi tur hende pa no organisa fiesta clandestino. E ta haya cu si tur hende ta consciente di esaki, celebracion manera Christmas lunch y Christmas dinner por continua, cu ta algo custumbra den e temporada aki. Pero esaki ta demanda pa henter comunidad ta cauteloso y tene nos tur na e reglanan cu a keda introduci pa evita e contagio masivo di Covid.
