Observatorio pa Igualdad di Genero, un organisacion cu ta traha pa duna cuenta preciso di incidentenan di violencia di genero na e isla, ta bisa cu e aña aki a asesina 49 muhe, y 20 a desaparece. Den e prome dos luna di cuarentena pa Covid-19, e observatorio a registra un aumento di 83 porciento den asesinato di muhe.
E gran mayoria di muhe den e base di dato di e observatorio a ser asesina pa partner intimo den explosionnan di abuso espontaneo.
E aumento den feminicidio ta un continuacion di un aumento cu a cuminsa despues cu horcan Maria a devasta infrastructura riba e isla na 2017, cobrando mas di 3mil bida, y lagando miles sin coriente, awa potable of vivienda pa varios luna. Na 2018, Puerto Rico a registra mas di un muhe asesina pa siman, alrededor di dobel e tasa per-capita na Merca pa e aña ey.
Despues di desasternan natural y awo e pandemia, abusonan menor contra hende muhe a bira mas severo, y abusonan severo a converti den homicidio y asesinatonan premedita.
“Na momento cu bo tin tur e factornan di stress aki, un modelo colonialista, e horcannan, e teremotonan constant e aña aki, y awo Covid – cu ta kita sistema di sosten di hende – tur cos ta añadi. Pero bo no mester hisa bo man, bo no mester mata”, segun Dr. Roberta Hurtado, kende ta duna les na Universidad Estatal di New York, y a publica reportenan riba violencia di genero na Puerto Rico.
Estado di ‘crisis a largo plaso’ di Puerto Rico ta empeora mas ainda pa sosten inconsistente, desorganisacion y apatia di polis y gobierno den e casonan di feminicidio y abuso, segun Tania Rosario Mendez, director ehecutivo di Taller Salud, un organisacion sin fin di lucro cu ta asisti victimanan di violencia di genero riba e parti nort di e isla. “Na momento cu Covid a yega, nos [organisacionnan di violencia di genero] tabata na altura y nos a purba di pone gobierno na altura tambe. Loke nos a mira e aña aki ta cu e sistema di proteccion social ta mucho fragil na Puerto Rico… e ta den collapse absoluto.”
