Gobierno di Nicolas Maduro ta felicita su mes cu un participacion di 31% di e ciudadanonan registra den eleccion di diadomingo pasa, cu ta algo mas di 5,2 miyon votador. Den ultimo eleccion pa parlamento na 2015, mas di 17 miyon ciudadano a vota pa duna oposicion contra gobierno Chavista un mayoria absoluto den Asamblea Nacional, loke tabata alrededor di 71% di e electorado e tempo ey.
Di diferente banda ya rechazo a cuminza yega, nengando cualkier legitimidad na e contienda electoral aki. Union Europeo a emiti un declaracion den cual ta rechaza e eleccion di antemano pasobra esaki tabata carece di e minimo condicionnan di eleccion liber y democratico.
Igualmente un grupo di 18 pais di continente Americano a emiti un declaracion similar, no reconociendo e resultado electoral, entre nan e paisnan reuni den e Grupo di Lima, cu ta declara cu e proceso electoral no a cumpli cu e minimo standardnan pa eleccion husto, transparente y cu participacion di tur forza politico.
Di parti di gobierno Mericano, secrtetario di estado Mike Pompeo a declara antes caba cu e eleccion aki ta “un fraude y un farsa, no un eleccion”. A traves di rednan social Pompeo a expresa cu “e fraude electoral di Venezuela a tuma lugar caba. E resulatdonan anuncia pa e regimen ilegitimo di Maduro no lo refleha e voluntad di pueblo Venezolano”.
Cu e eleccion aki, regimen di Maduro ta haya control atrobe di Asamblea Nacional, unda e alianza Chavista, lidera pa PSUV, e partido Chavista, reuni den e Gran Polo Patriotico (GPP), a haya 67,6% di e votonan, segun anuncio di Conseho Nacional Electoral (CNE). E alianza no Chavista, den cual ta figura entre otro e partido democrata cristian Copei, a haya casi 18% di voto. Chavismo a logra alrededor di 3,5 miyon voto, menos cu e mas di 5 miyon na 2015.
