“Si nan a saca e conclusion aki, nan mester skirbi e argumento.” Asina Procurador General Bote ter Steege a bisa Bon Dia Aruba riba e ponencia cu e lazonan entre e mundo baho y resto di comunidad ta hopi cera cu otro.

Esaki despues cu instancianan manera Raad van Advies, Adviesraad Internationale Vraagstukken, AIV (organo di conseho pa problematicanan internacional di Hulanda) y tambe describi den e landspakket pa Aruba a bati alarma pa haci mas pa sigura un estado di derecho na Aruba.

Observacionnan riba e vulnerabilidad di Aruba

Manera ta conoci, Hulanda kier yuda Aruba pa bringa criminalidad internacional, cu ta afecta e pais grandemente a pesar di su tamaño (red. den otro palabra, Hulanda ta considera cu e nivel di crimen internacional/organisa ta hopi halto pa un pais chikito manera Aruba).

Motibo di e preocupacion aki ta e traficacion di droga y hende, contrabanda di hende y arma. E atencion aki no ta algo nobo.

AIV di su banda a bisa recientemente, cu criminalidad di droga internacional (droga) ta un di e peligernan mas grandi pa siguridad di e habitantenan di e paisnan CAS, cu ta hopi dependiente riba mantencion di ordo y husticia den Reino pa nan bienestar. Latino America y Caribe ta entre e regionnan mas criminal y insigur rond mundo. Rednan y rutanan di transporte pa cocaina, e actividad criminal mas lucrativo y violento, ademas ta atractivo pa contrabanda di arma, hende y recursonan mineral ilegalmente obteni (oro). Personanan y organisacionnan cu ta alia na terorismo ta probecha di esakinan. organisacionnan criminal di Hulanda y otro paisnan Europeo ta abusa di vulnerabilidadnan den e mantencion di ordo den region di Caribe, y ta esnan cu mas ta tuma e cantidad di cocaina cu ta bin for di e region di Caribe. Criminalnan ta haya acceso na e mercado internacional, via e islanan y Hulanda. Criminalnan cu paspoort Hulandes por biaha sin problema entre paisnan den Europa y e parti Caribense di Reino, y for di e islanan mes pa e regio completo.

Reino pa mucho tempo no a duna suficiente prioridad na bringa criminalidad internacional. Hulanda ta carga gran parti di e responsabilidad aki, particularmente pasobra e pais aki mes a bira e hub mas importante di Europa pa traficacion di cocaina, y como e exportado mas grandi di droganan sintetico di mundo. Mehoracion fuerte ta necesario pa bringa criminalidad pisa internacional y organisa. E intercambio di informacion confiabel entre e paisnan, y e configuracion y compartimento di datonan criminal como tal, ta esencial pa investigacionnan debido. E institucionnan di recherche y di siguridad riba e islanan falta capacidad y intercambio di personal den e area di mantencion di ordo hopi biaha no ta posibel sea pa motibonan practico of otro. Ayudo y experticio di Hulanda ta bon bini, pero e paisnan den Caribe ta ripara si cu e continuacion y medionan disponibel no ta semper garantisa.

Crimen pisa di traficacion di droga

“Mi sa mucho poco di esaki,” Bote ter Steege a bisa, referiendo na e ponencianan menciona. “Mi ta wak menasa si. Mi ta yama esakinan e parti scondi di e traficacion di droga.”

Pero Ter Steege ta relativa e peliger. E transporte grandi di droga, den barconan grandi di container for di Sur Amerika ta bay directamente na Europa. Ta gana suma enorme y pa gran parti ta pasa pa Europa sin envolvimento di e paisnan Hulandes den Caribe. “De bes en cuando ta bin un barco di container cu hopi droga e direccion aki, pero nos sa esey, pasobra nos ta garanan. Mayoria ta bay of waf di Rotterdam, na Vlissingen, Antwerpen, Le Havre, hasta na Spaña.”

Fondonan cu holo

Locual si por ta un menasa pa Aruba ta cu e placa cu ta gana a base di crimen na Europa of Merca, cu tambe ta haya su cargamento di droga, ta bin e direccion aki den forma di inversion. “Mi ta mucho cortico na Aruba pa por bisa algo mas substancial di e tema aki. Pero mi por referi na mi periodo na Boneiro, unda nos tabata sa cu mita di e inversionnan den propiedadnan tabatin un holo straño. Kico e holo ta, no tabata mucho cla. Pero si tabata sa cu tabata un holo poco stinki. Locual a palabra na Boneiro ta cu pa cada permiso pa inversionnan grandi, di un miyon dollar bay ariba cu por haci e pregunta di unda e placa ta bin. E preguntanan aki cu termino lo percura cu hendenan cu no por contesta e pregunta, lo keda leu y esnan cu no tin problema pa autoridadnan wak criticamente nan finanzas, nan lo ta bon bini.”

Aruba

Pa e casonan unda e preguntanan aki, esta di unda e placa aki a bin y no ta duna contesta, mester ta hopi cauteloso. “Y den e area ey, Aruba ta hopi mas leu cu resto di e islanan ruman den Reino Hulandes. Realmente, Aruba ta hopi mas leu den e acercamento critico di e tipo di inversionistanan. Y siguramente lo tin otro ehempel unda e no a bay asina, pero mi por bisa unicamente locual mi ta mira. Mi a bay riba bishitanan di introduccion na instancianan y si mi tende den cua cantidad ta raporta transaccionnan sospechoso, mi por bisa cu e otro islanan tin hopi pa siña ainda. Si e ta suficiente? Pa esey mester puntra mi otro aña.”

Estado di Derecho y e responsabilidad di e Procurador General

Den e landspakket, Hulanda a pone cu Aruba mester bay de acuerdo cu pa reforsa e estado di derecho, entidadnan manera RST, Landsrecherche, Koninklijke Marechaussee y Kustwacht lo mester haya autoridad independiente pa haci nan propio investigacionnan. Nan mester responde si na Procurador General.

Bote ter Steege ta puntra su mes si Koninklijke Marechaussee lo kier e tarea ey, pasobra “nan ta unicamente siete hende na Aruba y nan trabao ta mas tanto pa haci trabao di polis militar na Marinierskazerne.” Ter Steege a bisa cu e no ta conoci cu plannan pa amplia e capacidad di Koninklijke Marechaussee na Aruba pa efectua investigacionnan.

Pa loke ta RST, esta e Recherche Samenwerkings Team, ya caba tin hende na Aruba cu ta haci trabao investigativo den cooperacion cu organonan local. Sinembargo locual e landspakket ta enfoca ta pa e organo central di RST haya mas pia na Aruba. “Mi no a haya ningun peticion pa investigacion. Na e momentonan no tin ningun investigacion andando bao mi encargo, pa medio di central di RST y/of Koninklijke Marechaussee of cualkier otro. Esey no por, pasobra no tin ningun palabracion.”

Ter Steege ta haya importante pa enfatisa cu e ta un Procurador General di Aruba. Y ley Ministerio Publico y e ley riba polis di Aruba ta cla. “Si tin cu investiga na Aruba, e mester sucede bao autoridad di e Procurador General aki, y mi ta duna hopi balor na esaki. Pasobra ami tin cu duna cuenta na e Minister di Husticia di Aruba. E no ta encarga cu investigacionnan individual, pero e ta carga e responsabilidad politico si den Parlamento. Y esaki mester ta bon regla. Mi no lo kier cu ta sucede investigacionnan, sin cu ami sa algo di dje. Pasobra si ami no sa di un investigacion asina, ami lo no por informa e Minister di Husticia debidamente.”

Den concepto di mr. Bote ter Steege, p’esey mes palabracionnan concreto ta crucial y con e cooperacion lo bira concreto ta un storia tecnico, pero tin palabracionnan caba haci pa un grupo di guia, unda Alto Comisario, Hefe di Landsrecherche, Fiscal Mayor bao guia di Procurador General ta funciona. “Esey ta e manera cu ta purba pa hunto keda cu bon bista kico ta sucede riba e isla.”

Tin otro aspecto, ter Steege ta enfatisa. Esta cu si tin investigacionnan andando, unda autoridadnan local no sa di nan, pa ley, ta trata di investigacionnan ilegal. “Mester di e peticion pa sosten huridico, pasobra Aruba ta un pais autonomo. Mester regl’e. No por haci algo sin mas aki na Aruba. Y si mester tuma e paso aki toch, huez lo no acepta e resultado di e investigacion.” Den pensamento di mr. Bote ter Steege, e periodo nos dilanti ta interesante, pa mira con ta bay duna contenido na e cooperacion aki. “Pero e disponibilidad si t’ey pa hunto busca na e posibilidadnan di cooperacion, pasobra esey si ta importante,” ta su conclusion.