Aruba lo tin opcion riba dos vacuna contra Covid; Grupo mas vulnerabel lo hay’e gratis

Tur medida introduci diasabra ultimo pa contraresta e aumento di casonan positivo di Covid, Minister Presidente Evelyn Wever-Croes ta spera cu nan lo duna su efecto den termino di dos siman aki.

Si ta resulta asina, y si cada miembro di nos comunidad ta duna su cooperacion, e prome mandatario ta na expectativa cu prome cu Pasco lo bini eventualmente mas flexibilidad pa comunidad por haci mas di locual no por awor. E por a duna espacio pa e tradicion di Dande, pero tambe e cendemento di pagara, lo por tuma luga, despues di e dos siman cu a cuminsa core diasabra ultimo, pa analisa si e casonan positivo a baha.

Vacuna

Tanten no tin ainda un bista specifico cual vacuna lo wordo aplica na Aruba. E prome mandatario a bisa cu e escogencia aki ta wordo haci pa medio di Hulanda. Nan ta contemplando un combinacion di e vacuna produci pa Moderna y Pfizer. Tambe Hulanda a informa cu tur e 30% di nos poblacion cu ta cay den e grupo mas vulnerabel, nan ta bay regala e vacuna. Of sea pais Aruba no tin cu cumpr’e.

Loke ainda no ta defini con lo para cu e otro 70% di nos poblacion, si nan mester paga pe of e lo ta gratis tambe. Gobierno di Aruba ta bay mira gasto y disponibilidad di nan pa asina tuma un decision riba esey. No tin un comision local pa determina cual sorto di vacuna Aruba ta kies a base di su eficacia, siguridad, etc… Pero si e parti logistico y aplicacion di e vacuna lo ta den man di e departamento cu semper ta na encargo di e plan y campaña di vacunacion di DVG.

Apesar cu ta wordo papia di e vacuna, premier Wever-Croes ta haya cu e vacunanan no ta bay soluciona di biaha tur e problemanan cu nos pais ta pasando aden. Mas bien e vacuna por protege esnan mas vulnerabel, y esaki ta e grupo cu ta bay hay’e prome. E grupo aki ta inclui e personal cu ta traha den cuido, personanan di edad halto 60 plus, y esunnan cu malesa cronico.

Pa prome mandatario esaki mester ta e prioridad y tambe su preocupacion. E splicacion cu el a haya di nos expertonan ta cu un vacuna ta mas adecua pa esun cu tin malesa cronico y otro pa esnan cu tin edad halto. Tin cierto condicion y reto riba e maneho di e vacunanan aki. Nan ta calcula cu lo tuma tres pa cuater luna pa administra e vacuna aki na esnan mas vulnerabel.

Mientras cu nan no ta haya e vacuna y mientras e grupo mas vulnerabel no ta protegi, logicamente gobierno no por permiti actividad cu por produci aglomeracion. “Ohala cu poder di Dios nos por tin cierto Dande y cierto cendemento di pagara, pero no manera añanan anterior,” el a bisa.