December ta e temporada cu mas hende ta gasta placa, sea ta pa prepara pa cumpra paña of cu nan ta busca nan decoracionnan di cas, pero loke cu sigur den algun cas no ta keda sin falta ta e kerstboom cu ta trece e ambiente di e temporada.
Aunke cu e aña aki tabata un aña basta duro pa mundo henter y Aruba tambe e kerstboom den cas no ta keda sin falta. Sinembargo hecho ta cu e situacion di COVID no a caba na Aruba, e virus ta na Aruba y nos tur mester ta consciente di esaki y tambe keda proteha nos mes den tur momento.
Loke cu ta un realidad tambe cu kerstboom ta caba tur aña; si bo no yega na tempo bo ta keda sin kerstboom pa e temporada.
Ayera durante oranan di atardi por a mira un aglomeracion di hende pa por cumpra nan kerstboom di e aña aki, un cantidad grandi di hende den Vondelaan a pone cu e team special cu ta controla luganan cu ta encera polis y DVG a bay cera e luga y asina indica e doño cua ta e manera mas adecua pa haci esaki sin cu tin un multitud di hende cu por core risico cu e virus ta den bisindario.
E propietario a compronde esaki y a cera e luga, pero cu lo habri mañan back cu e instruccionnan y e tipnan cu DVG lo duna, pa asina tin un miho fluho di hende pa por busca nan kerstboom sin ningun problema.
