Ayera tardi tabatin un reunion cu intermediacion di Mediador di Gobierno na ex sede di TNO Aruba, entre gerencia di Post Aruba y dirigentenan sindical di SEPPA y STA pa evalua e situacion di e compania estatal aki.
Director di Post Aruba, Guillermo Raymond a declara na Bon Dia Aruba cu e reunion a bay den bon atmosfera, unda nan a trata un par di punto, entre nan e suma di 105 florin cu cada trahado ta haya di aumento salarial. Nan ta bay wak con nan por yega na un areglo pa otro aña. Ya sea cu nan ta par’e of nan ta ‘freeze’ temporalmente. Esaki debi na e situacion di pais Aruba y tambe e mesun situacion di Post Aruba, cu no ta bon.
El a bisa cu aña 2020 a bira uno hopi dificil pa mundo postal. Ademas e situacion di e pandemia no a yuda na nada tampoco. Nan a confronta cu situacion hopi dificil pa nan por funciona. Nan ta depende practicamente di presupuesto of subsidio di gobierno pa por sobrevivi. Pero ya caba gobierno a splica nan cu e 12.6% di cortamento pa e fondo di solidaridad (FASE) lo wordo aplica pa nan. Ya caba nan a informa na tur e trahadonan pa gobierno haya e placa aki, cu ta alrededor di casi 500 mil florin.
Igualmente encuanto e posibilidad di bende Post Aruba a base di e acuerdo firma cu Hulanda, el a bisa cu nada di esaki a wordo trece dilanti durante e reunion cu nan a sostene cu gobierno. Ademas e mandatario a priminti cu tur hende lo wordo mantene na trabao.
Tambe e situacion cu Hulanda ta pone cu mester bin cu cierto medidanan cu gobierno mester adopta. Pero riba e medida di corta riba personal di Post Aruba, nan no a papia nada di esey, segun Sr. Raymond.
