Vice Ministro di Polis di Venezuela, Edylberto José Molina, a ordena diadomingo cu a pasa pa detene tur ciudadano cu ta move cu cantidad grandi di biyete di 100 bolivar, den un documento cu a ser publica pa Eligio Rojas riba su account di Twitter.
E comunicado a ser publica diadomingo cu “caracter prioritario” , y ta dirigi na tur director di Polis.
Desde diadomingo pasa polis mester traha riba control estricto, for di polis riba waf, aeropuerto, punto di control di frontera, caminda principal y alternativo, cu e obhetivo di prohibi entrada di biyete di 100 bolivar den teritorio di Venezuela.
A ordena tambe pa detene tur hende cu ta cana cu cantidad grandi di biyete di 100 den teritorio Venezolano, e comunicado a splica. Gobierno Venezolano a ordena cambio di tur biyete di 100 bolivar den 72 ora, hunto cu introduccion di biyete di valor mas halto, te cu 20.000 bolivar, como respuesta na e inflacion mas halto actualmente na mundo.
Tambe e medida ta pretende frustra e cambio di biyete cu supuestamente ta den man di hende den zona fronterizo cu Colombia, pa asina para cambio ilegal di bolivar. Criticonan ta duda cu e medida lo tin efecto riba cambio di bolivar riba mercado negro.
Venezuela a confisca biyete cu ta dentra for di Colombia
(TVN2).- Autoridad a cuminsa confisca biyete di 100 bolivar, cu ta e biyete di denominacion mas halto den moneda di Venezuela, cu ta drenta e pais via di frontera cu Colombia, despues cu presidente di Venezuela Nicolas Maduro a anuncia cu biyete di 100 ta keda sin balor den proximo dianan.
A cuminsa confisca e biyete di 100 bolivar na frontera ora cu ta purba bin Venezuela cu nan. E decision a causa panico cercania di frontera, Ministro di Interior y Husticia a informa riba Twitter.
Riba red social nan a publica par di potret cu tabata mustra hopi polis ora cu nan tabata cuida e biyetenan confisca pa militarnan di Venezuela.
Mas dificultad na Venezuela: sin cash pa haci compra di Pasco E biyete di 100 bolivar tin un cambio oficial di 0.15 (prijs di un caramel), pero den mercado negro di dollar e cantidad aki ta 0.02 dollar so. E medida di trece biyete y moneda nobo, ta indica aceptacion di banda di gobierno di un devaluacion di bolivar
Venezolano y un indice halto di inflacion na Venezuela. E inflacion aki ta considera como esun mas halto di mundo, cu e aña aki por yega 700% .
