Bote ter Steege (pronuncia ‘Botte) (59) tabata gosa di su diadomingo na cas, ora cu el a haya informacion di e trabao di polis pa para plannan grandi di un atraco. No solamente el a comunica cu Alto Comisario, Vanessa Kock pero tambe cu su hefe directo cu ta Minister di Husticia, Andin Bikker. Y aunke cu e comunicacion tabata riba su dia liber, e tabata contento cu e comunicacion tabatin un desenlace positivo pa Aruba.

E Procurador General nobo a introduci su mes prome biaha na Aruba, pa medio di Bon Dia Aruba pa papia di e trabao su dilanti, despues di a asumi e funcion como tres luna pasa.

Bote ter Steege ta un hende cu un experiencia amplio den e trabao di investigacion penal. Su carera a cuminza como polis, unda entre otro el a specialisa den investigacion riba casonan di moral (zeden), pa despues drenta Ministerio Publico.

Mr. Ter Steege a bin di Islanan BES unda e tabata Fiscal Mayor. Pues e tabata familiar caba cu e clima di Caribe y kizas tambe un poco e cultura. Por lo menos, esey el a pensa. Unabes na Aruba, su conclusion ta cu no por compara e trabao na islanan BES y Boneiro en particular y esun na Aruba y e motibo ta simpel. E tamaño di poblacion ta hunga un papel. “Por bisa cu Boneiro ta mas un pueblo y Aruba ta un ciudad,” Ter Steege a bisa Bon Dia Aruba. “Boneiro ta parti di Caribe Hulandes y Aruba ta un pais autonomo.”

Aruba ta hopi politiza

Pero locual si el a siña di Aruba ta pa medio di observa e eleccionnan Presidencial di Merca, pasobra den su concepto, e antagonismo cu tin na Merca ta hopi presente na Aruba. “Mi ta haya cu hopi cos na Aruba ta politiza. E ta asina na hopi caminda, pero aki mas. Y si mi mira e campaña politico na Merca, mi ta sinti cu e ta algo cu ta reconoce aki. Na Aruba, hendenan ta hopi fuerte contra otro. Na Merca tin un libertad di expresion casi completo. Reino Hulandes tin libertad di expresion te na cierto limite. No por insulta, discrimina. E limite ey no tin na Merca. Pero e forma con ta confronta otro ta hopi manera Merca.” Ter Steege a comenta esaki cu Prome Minister, Evelyn Wever Croes durante un di su encuentronan cu e Prome Mandatario di Aruba. “Mi a wak algo asina na Boneiro pero no na e escala di Aruba.”

Ministerio Publico mester sigui un procedura cla

E pregunta ta si Ministerio Publico mester ta e referee. “Mi no tin problema cu e sentimento cu nos ta sinta memey. P’esey mi ta haya importante cu Ministerio Publico, sin importa di ken e ta traha – no por nada Dama Husticia su wowonan ta tapa—haci su trabao manera mester ta, efectua e investigacionnan di miho manera posibel.”

Locual esnan para pafo ta bisa, of duna nan mesun interpretacion, no ta su responsabilidad, Bote ter Steege a bisa. “Locual mester yama mi atencion ta e calidad di e investigacion y procedura penal. Si mi por splica e procedura awe, mi mester por splica e mesun procedura aki cinco aña.”

Pero e Procurador General no ta ciego y ta mira movecionnan, mescos cu tabata e caso na Boneiro, cu ta purba politiza decisionnan di Ministerio Publico. “Mi por bisa unicamente cu esey no ta e caso.”

Politico corupto y Ministerio Publico

Na Aruba, ultimo tempo ta hopi hende a acudi na Ministerio Publico pa entrega keho di corupcion contra politiconan. Los di e kehonan, Ministerio Publico a persigui un ex-Minister te cu a haya un sentencia y awor e caso ta wardando resolucion di Corte Superior, y tin dos investigacion penal contra ex-Ministernan andando. “Critica y discusion politico ta pertenece den Parlamento. Entre Parlamentarionan mes of entre e Parlamentarionan y Ministernan durante reunion. Pero si ta trata sospecho di un acto penal, esey ta tarea di Ministerio Publico. E ta un derecho di cada uno pa haci entrega di keho di hechonan castigabel. Pero ta asina si cu e Procurador General aki y su hendenan, ta bay mira mesora si ta trata di storianan of ta actonan concreto cu ta cuadra cu e sospecho. Mi a mira algun pasa mi dilanti caba y mayoria toch ta storia. Y e storianan aki ta bin riba despacho di Ministerio Publico y e ora e caso ta relativamente simpel.”

Si no tin hechonan concreto cu por demostra un acto castigabel, Ministerio Publico no ta haci nada cu e kehonan. “E ta zona manera un docente di scol ora di bisa cu casonan asina ta pertenece den Parlamento, pasobra tur hende sa cu e ta asina.” Y lo no tin cambio den e maneho aki, Ter Steege a enfatisa. “Pero ta haya e caminda pa Ministerio Publico y Procurador General hopi lihe. Esey si ta yamativo. Na Boneiro, tambe tabata scoge mesora pa e caminda pa e Fiscal Mayor. Pero mi no ta e solucion pa hopi problema. Mi no ta e solucion pa discusionnan politico y tampoco e solucion pa storianan riba Aruba.” Na Boneiro, Gezaghebber a adverti Bote ter Steege cu tin hopi redo, pero a cord’e tambe cu redo no ta prueba. “Mi no ta kere cu e ta mucho diferente na Aruba.”

Dispensa na Ramonsito Booi

Y mr. Ter Steege a haya su mes ta pidi dispensa na nomber di Ministerio Publico na e politiconan Boneriano, Ramonsito Booi y Burney Elhage y su casa. Desde 2009, Ministerio Publico a persigui e tresnan aki pa fraude, y e caso a termina na 2015 cu sentencia na fabor di e acusadonan. Tabata na juni ultimo cu Ter Steege a pidi dispensa pa e caso.

“Mi no sa kico e despensa aki nifica pa Ministerio Publico. Pero si mi por bisa kico e ta nifica pa mi. Si mi ta sinti cu no mester a duna dispensa, lo mi no a hacie tampoco. E Ombudsman Nacional di Hulanda a conseha pa duna e dispensa, pero e no tabata un instruccion. E caso ta hopi prome cu mi tempo y mi mester a studia esaki. Y pa mi e no tabata complica, y pa esey e no tabata un problema pa duna un dispensa di curazon, pasobra mi ta haya cu Ministerio Publico na cierto momento a sigui algun evaluacion cu di mesun manera por a caba di otro manera. E persecucion di un hecho castigabel, e persecucion di sospechosonan ta trabao di hende. Hende ta haci fout. Y e ta bay riba hende. Pues, e ta corecto cu ta mira e trabao di Ministerio Publico na forma critico y e ta na su luga pa acepta cu a haci fout y hunto determina cua ta e lesnan cu por saca di un fout asina. Locual ami a siña ta cu e autenticidad y honestidad den brinda dispensa ta e miho caminda.”

Politiconan sospecha na Aruba

Pero, no ta pasobra e caso contra Ramonsito Booi y Burney Elhage a termina di un forma, ta nifica cu e investigacionnan penal contra dos ex-Minister na Aruba lo termina mescos. Pio, segun Procurador General, bao ningun circunstancia por compara e casonan. Ni esun na Boneiro como e investigacion di e dos Ministernan. “Esey ta e prome les. Nos no por compara ningun, pasobra tur caso ta diferente. Mi tin 40 aña di investigacion penal, prome como polis y despues como fiscal y nunca mi a topa cu dos caso mescos.”

Segun Ter Steege, kizas pa media e ta dificil pa kere, pasobra e tin hopi nuance y e mensahe e ora ta kita, pero ta asina si como Ministerio Publico ta traha. Pa Ter Steege, pa Ministerio no tin diferencia con pa anda cu hechonan castigabel cu politiconan por a comete of ciudadanonan cu ta haci nan mes culpabel na corupcion. Mester traha cu e mesun cautela. “Ora di duda, y mi a siña esaki dia cu mi mester a bay pa mi rijbewijs, no mester pasa auto. Y ora di duda no pasa auto, tambe ta conta pa Ministerio Publico.” E bunita di nos Estado di Derecho ta cu semper tin e control di e huez imparcial, kende por determina si tin duda den e hechonan. “Esey ta importante. No core haci algo. Mester pensa bon, pasobra ta trabao di hende cu ta riba hende. Mester percura cada biaha cu tin ‘checks and balances.’” Como tal, Bote Ter Steege tin confianza cu e casonan ta cana bon. “Y nan no ta limita na Aruba. Na Hulanda, tin rijksrecherche cu nan trabao completo ta dedica na tipo di investigacion asina aki. No mester pretende cu corupcion di parti di politiconan ta sosode solamente na Aruba of Caribe Hulandes. Y tur ta casonan cu mester investiga si na mesun manera.”

Corupcion ta mina estado di derecho

Pero aunke cu mester ta cauteloso ora di investiga, ta importante si pa actua contra corupcion. Si tin algo cu ta mina un estado di derecho, ta corupcion. No ta importa si ta corupcion di un politico, un fiscal of un ciudadano. “Ora cu ta comete corupcion, sea ta un Director di compania of un periodista, semper tin hende cu sa. Nos famia sa, nos bisiñanan sa y siguramente, henter e bario sa. Y esey no ta locual nos kier como sociedad.”

Enfoke ta ‘core business’ di Ministerio Publico

Pa por sigura cu tin tur atencion pa e siguridad di Aruba, PG Ter Steege ta reuni semanalmente cu Minister di Husticia, kende ta encabesa e reunion entre tur actor encarga cu orden publico y estado di derecho na Aruba, for di Director di NCTVI (National Central Bureau Counterterrorism, Safety and INTERPOL, te na Alto Comisario.

Pa Ter Steege, sinembargo, su enfoke diario ta e ‘core business’ di Ministerio Publico. Un Fiscal por ta lidera un investigacion, pero e trabao mes ta sucede pa medio di polis. Esey mester sucede lo miho posibel. Despues Ministerio Publico ta dicidi si mester bin un caso penal. Esey tambe mester sucede lo miho posibel. Y esey ta importante. “Pa mi, e enfoke riba e core business ta importante.”

E deliberacionnan den e grupo ta keda secreto, pero ta percura si cu e cadena di husticia bao guia di e Minister di Husticia ta keda structuralmente den contacto cu otro. “E periodo aki ta fastioso pa Aruba, un crisis economico a causa di un pandemia y ta wak esey tambe. Como tal, locual ta haci ta traha hunto pa evita cu por ehempel atraconan ta aumenta. Y pa esey mes polis a dicidi pa pone esfuerso riba e aspecto aki. Ademas, mester pone atencion riba e hecho cu toch tin mas turista riba Aruba cu a spera, y como tal, Polis tin trabao pa haci,” tabata e comentario di e Procurador General na Bon Dia Aruba.

Den e edicionnan siguiente lo publica mas di e combersacion amplio cu e Hefe mas halto di investigacion hudicial di Aruba, entre otro riba e fenomeno di abuso di mucha.