Parlamentario independiente Daphne Lejuez a dirigi un serie di pregunta na ministro encarga cu Salubridad Publico, relaciona cu e nombramento cu un grupo di seis persona, cu tabata traha pa buro di e mandatario, como chauffeur pa transporta pacient, y otro persona como hefe di e seccion di Ouderenzorg na departamento di Salubridad Publico (DVG).
Banda di puntra si e noticia publica den Bon Dia Aruba di dia 26 november 2020 ta berdadero, e parlamentario ta desea tambe di sa exactamente ki tipo di funcion e personanan aki tabatin na e oficina di e ministro, y ki capacidad, educacion y schaal nan tabatin. Tambe si e ministro por indica cual puestonan vacante a surgi awor na su oficina y con e mandatario tin pensa pa cubri e tareanan cu e personanan aki tabatin den su despacho y ademas ken ta bay ta encarga cu esaki.
E parlamentario ta observa tambe cu, ya cu ta trata di casi 25% di e capacidad di e maximo 25 persona cu e despacho di un ministro por tin, con e ministro tin pensa pa cubri e perdida repentino di capacidad aki. Y si acaso e perdida di e personal aki no tin efecto directo riba capacidad operacional di e despacho ministerial, lo ta corecto anto pa conclui cu e funcionnan aki no tabata esencial pa funcionamento di e oficina, ta e siguiente pregunta cu e parlamentario ta haci.
Seguidamente e parlamentario ta haci pregunta encuanto e ‘ alle middelen” cu cada empleado mag hiba na su proximo lugar, cu ta na DVG. E pregunta ta pakico a scoge pa e forma aki y tambe ki relacion e decision di Conseho di ministro tin cu e Plan di Maneho di Personal 9BVP) y cu e acuerdo cu tin cu Hulanda pa baha gasto di personal y cu e conseho di CAft tocante reduccion di gasto di personal. Tambe si e mandatario por comparti e conseho di departamento di Recurso humano (DRH) riba e asunto aki.
Lejuez a observa tambe cu segun declaracion haci pa Ministro Presidente e personal na e despachonan ta contrata solamente pa e duracion di e gabinete y con esaki ta cuadra cu un nombramento pa cinco aña na e departamento concerni. Esaki tambe en vista di eleccion dentro di menos cu un aña y unda normalmente e personanan aki lo a mira nan contrato termina, pero awor a haya cuatro aña extra. Si ministro por splica esaki pasobra e ta cuminza parce un ‘afscheidsbeleid’.
E parlamentario ta haci tambe pregunta tocante e supuesto situacion di emergencia cu a surgi encuanto e transporte di pacient, specificamente ki tempo y pakico e situacion aki a surgi.
Demas preguntanan haci pa e parlamentario, entre otro tocante e capacidad di e personanan nombra compara cu esnan cu a perde trabao na e empresa cu tabata duna e servicio, ta disponible den e documento original (na Hulandes) via e link https://drive.google.com/file/d/1IhTgR_uh73wyXZdXQrDR7d9qFbKWTHrg/view?usp=sharing
Of por scan e QRcode adhunto.
