E proceso ta largo pa guia y rehabilita un persona cu a comete delito contra moral

Reclasering tambe ta forma parti ora ta trata den yuda hende cu ta wordo acusa di abuso sexual. Segun Seraida Pemberton-Leonard, directora di Stichting Reclassering Jeugdbescherming Aruba, na momento cu un hende haya su mes cu problema di husticia pa un delito contra moral, den hopi caso Ministerio Publico ta pidi Reclasering pa traha un rapport. E Reclaserings Rapport ta ilustra ken ta e persona, su situacion financiero y social, y mas, pa asina por haya un bista di ken e persona ey ta y kico por a conduci cu el a comete un delito contra moral.

A base di esey nos ta wak cuanto red flags e persona tin den su bida, y nos ta duna conseho na Ministerio Publico y na huesnan riba kico nos ta pensa ta e ayudo of guia cu e persona tin mester”, segun sra. Leonard. Esaki ta e parti prome cu e persona wordo sentencia. Na momento cu Fiscal of hues tuma un decision den e caso, e por pone e persona bao guia di Reclasering, den cual nan ta bay traha riba e aspectonan pa evita cu e persona bolbe comete e delito. Delitonan contra moral hopi biaha ta hopi biaha relaciona cu bo forma di pensa, segun e directora ta sigui elabora. “Esey no ta facil pa traha cu ne, e persona lo mester un guia den cual e por wak kico el a haci, tuma e responsabilidad di locual el a haci y cambia su comportacion, cual ta un proceso basta largo”, segun sra. Leonard.

E afdeling di Psicologia na Reclasering ta trata cu e personanan aki. Reclasering ta trata cu hobennan cu a cay sera cumisando for di 12 aña bay ariba, pues nan ta trata cu e menor di edadnan y adultonan cu ta haya castigo.

Registracion ‘sex offenders’
Ley ta bisa cu e persona tin derecho riba su privacidad, y lo mester cana un caminda legal por ehempel pa locual nan ta haci na Merca; registracion di hendenan cu a comete delitonan contra moral, y ora bo bay e registro aki bo por mira si e persona ta biba den bo bario of banda di un scol. Tur esaki lo mester wordo regla legalmente pa haci e proceso aki na Aruba.

Reclasering ta encarga na traha rapport y duna guia, pero e cantidad di hende cu ta yega na Reclasering pa casonan contra moral no ta asina halto. Ta papiando aki di cuater of cinco pa aña cual ta hopi abao den comparacion cu loke ta sali den publicidad.