Directora di departamento di Impuesto, Luenne Gomez-Pieters a informa cu a mantene entrada di impuesto na un nivel aceptabel.

E cifranan te cu october ultimo ta mustra cu e caida den entrada di impuesto ta 24%. E ta mucho menos di loke nan a premira cu tabata entre 40% pa 44%. “Esaki ta algo cu sigur ta positivo si nos ta mira pa futuro,” el a bisa.

Sra. Gomez-Pieters a indica cu departamento di Impuesto tin un rol importante pa garantisa entrada di pago di impuesto den caha di gobierno. Tambe nan a pasa den 8 luna dificil tras di lomba locual a demanda di nan un transformacion enorme. No solamente riba tereno di digitalisacion caminda nan ta facilita e proceso pa nan cliente por cumpli cu nan compromiso di pago di belasting.

Pero nan ta mira cu e cumplimento a subi mas apesar cu nos ta den un crisis produci pa e pandemia. A pesar di e situacion aki nan ta mira cu nan contribuyentenan no a stop di paga nan impuesto y tampoco nan no a stop di atende cu nan responsabilidad.

Impuestonan cu a genera entradanan

El a declara na e matutino aki cu nan tin cierto tipo di impuesto cu a contribui mucho mas tanto cu normal. Un di nan ta dividend belasting caminda nan a bin cu un tarifa special cu a wordo reduci na 10%.

Nan por wak cu tin hopi contribuyente of companianan cu a saca dividendo pa nan dispone di mas cash den nan compania. Logicamente cu esaki, departamento di Impuesto ta haya mas entrada pa e concepto di belasting aki.

Otro pago di impuesto cu ta contribuyendo pa fortalece entrada di gobierno ta e impuesto riba vehiculo di motor. Nan ta mira cu tin un cumplimento di 88% di nan clientenan total a cumpli cu nan debe di impuesto.

Alivio fiscal

E resultado aki no a bay sin mas. Como departamento di Impuesto nan a bira mas flexibel y nan a yega di aplasa terminonan y tambe nan a tene cuenta cu e situacion. Den e alivio fiscal a aplasa no solamente cierto terminonan legal, pero tambe nan a bin cu descuento ariba por ehempel primanan social di AOV y AWW. Esey a conta gobierno alrededor di mas cu 2.5 miyon florin. E ta mira cu segun e forsa financiero por duna, nan tambe por duna cierto alivio fiscal.

E ta reconoce cu tin hende cu tabata spera mas riba e alivio fiscal cu gobierno a duna. Pero e ta haya cu paisnan grandi manera Canada, Italia, Merca y Hulanda, nan tin mucho mas espacio financiero den nan presupuesto pa duna mucho mas. Pero na Aruba “nan tin cu traha cu e cartanan cu a wordo poni riba mesa pa nan.”

Nan por mira cu e tabata eficiente y e tipo di alivio fiscal ta haya reaccion di parti di e contribuyentenan. Locual nan ta mira cu pa comerciantenan chikito tin un apetit grandi pa e areglo fiscal cu a keda introduci pa nan. Tambe nan por wak cu negoshi nobo cu por haya un descuento di un 50% di e capital di inversion cu nan tin pa cuminsa nan negoshi te un maximo di 30%, ta algo cu nan por haci bon uso di dje.

Igualmente tin hopi peticion pa areglo di pago flexibel. Tambe esnan cu tin debenan bieu cu pa nan sanea nan debe nan ta haya un descuento di 30% ta haci uso di esaki. Departamento di Impuesto ta wak un avalancha di peticion cu ta mustra cu nan clientenan kier regla nan asunto di impuesto.

Aworaki nan tin e espacio pa hacie di un forma mas flexibel. Sinembargo Sra. Gomez-Pieters a laga sa cu unabes cu tur cos bay riba un tipo di normalidad bek, nan tin cu ahusta atrobe e tipo di flexibilidad cu a wordo introduci den tempo di pandemia.

“E ta un balansa cu un departamento di Impuesto mester por busca constantemente con duro bo ta primi y con duro bo ta pusha. Y kico ta posibel y kico no ta posibel,” el a declara.

Sra. Gomez-Pieters ta reconoce cu e ta un balansa dificil pa haya, pasobra di un banda tin hopi presion pa entrada di impuesto debi cu si no tin e entrada aki, pais Aruba dificilmente por sigui opera creando un situacion mas dificil di loke nos ta aden actualmente.

Pero nan como departamento di Impuesto ta consciente cu e situacion cu nos comunidad ta pasando aden debi na e Covid crisis. “Nos rol no ta di horca hende tampoco,” el a declara. E ta haya cu tin caso di hende cu ta bin den publico pa denuncia cu nan a pone beslag riba nan propiedad, sin conta historia completo.

El a agrega cu departamento di Impuesto ta duna diferente oportunidad den un periodo di tempo pa asina e contribuyente por yega na un areglo of solucion di pago. Tambe nan ta asigna un persona pa por atende cu bo caso specifico. Nan sa cu tin biaha e proceso aki no ta facil debi cu e persona por ta no tin entrada, y no sa con pa cuminsa atende cu e compromiso aki. Pero e ta haya cu keda sin haci nada no ta un opcion.