Prome Minister Rhuggenaath ta culpando e yiu di Corsou cu t’e ta culpabel pa e echo cu e pandemia a empeora aki na Corsou. Pero ban analisa. E prome caso di covid na Corsou tabata di un stranhero cu a bini aki den temporada di carnaval y a move memey di yen hende aki. Nos a keda basta tempo sin infeccion y esaki pa motibo di un comportacion masha bon mes di pueblo di Corsou ku a tene nan mes masha bon mes na e regla y palabracionnan.
Gobierno a anuncia cu nan ta bai habri pa Hulanda y un gran mayoria di pueblo tabata contra di e decision aki. Despues cu a habri a presenta e prome contagia local. Pues analisis logico ta bisa cu e infeccion a bini di afo pero manera na tur pais cu e pandemia plama y extende ta bou di e poblacion esaki ta sosode pasobra stranheronan cu drenta un pais ta keda un temporada cortico.
Sinembargo nan ta move den pueblo i tin contacto directo cu pueblo cu ta labora entre otro den hotel, horeca, banco, pacus, negoshinan y demas. E turista biahero ta un yiu di Corsou so e mester infecta ta cla. E turista ta drenta avion bay bek su pais. E yiu di Corsou ey ta bay su cas y sigui pega famia, amigo y conoci. Mas pio ainda ora e no ta sinti niun sintoma e ta infecta y por lo tanto ta plama e virus!
Ta p’esei paisnan responsabel y cu nan gobierno cu tin interes di nan ciudadanonan na pecho ta cera nan frontera pa stranhero specialmente esunnan di paisnan di risico halto manera Hulanda. Esaki ta igual den tur pais. Minister Rhuggenaath ta ripiti y keda bisa pueblo di Corsou cu ta yiu di Corsou ta iresponsabel y cu ta nos mes ta plama e virus den scol, empresa, instituto, hospital etc. Si e virus drenta Corsou ta bou di yiunan di Corsou cu tin contacto diario manera na trabou y na cas den seno di famia e ta sigui plama. Esey ta normal manera den tur pais. Ora a bolbe introduci reglanan mayoria yu di Corsou ta cumpliendo cu esaki.
Relatonan di polis ta bisa bon cla cu pueblo a obedece y ta cumpli cu algun excepcion aisla. Pues ta un grupito masha chikito tin cu no ta comporta. Un cantidad di nan ta mal contento y no kier tene nan mes na regla paso nan ta mira cu den e asunto di Covid aki tin midimento cu diferente midi. Nan ta tuma nota cu tin un grupo hopi grandi di macamba AKI NA KÒRSOU no ta obedece y cumpli cu niun regla paso nan ta haña cu ta trata di un simpel grip y no por priva nan di nan libertad.
Ta dicon minister Rhuggenaath cu mester sa miho ta insulta nos inteligencia, brongosa yiu di Corsou y sigui makista nos tanto asina como pueblo E pueblo cu abo como opperbevelhebber a subi su desempleo, corta den su enseñansa y deporte, laga su enseñansa desampara sin minister, sin maneho di crisis pa den e pandemia aki, sin un curiculo adapta pa crea yiunan di Corsou nobo, capaz di saca e luga aki dilanti, caminda e team di maneho y su docentenan ta creativo y ta traha cu alma y curpa cu amor pa nan vocacion haciendo milager pa nos alumnonan, e pueblo cu bo a oprimi su cultura cerando Cas di Cultura, e pueblo cu bo a mata su farandula, e pueblo cu ta come for di container paso 95% di loke e ta consumi ta ser importa, e pueblo cu bo ta priva di su playa y su costanan ofreciendo esakinan na stranhero y gran capital, bende tur su patrimonionan pa doria dosplaca , e pueblo caminda e grandi cu ta portado di conocemento y experencia no ta ser balora ni aprecia, un hubentud cu ta crece den un pais caminda e no ta mira niun clase di perspectiva, cu no ta lag’é sinti orguyoso, (compromete) ni no tin amor pa e patria aki, paso bo no a kultiv’é den dje. E pueblo caminda esun cu un desabilidad mental of fisico ta ser aparta, isola y no a crea posibilidad nan pa e integra den e comunidad aki. Ta Kico nos a haci e homber aki? Anto e cherry riba e bolo MALBADO ta bin ora e mesun minister Rhuggenaath ta bisa na bos halto na prensa Hulandes y e pueblo Hulandes cu Corsou ta keda habri pa turista Hulandes pasobra e subida di e cantidad di infectadonan na Corsou ta pa motibo di mal comportacion di pueblo mes.
Pa kico keda insulta nos? Pa kico alaba e macamba y bis’é cu e ta bon bini siendo cu e ta bini di un pais cu ta mal afecta pa e virus di corona?. E mesun macamba cu ta ta bon bini na Corsou na mes momento no ta bon bini den practicamente niun pais serio na mundo.
Cerca nos so nan ta bon bini. Awor bon bini pa ki motibo? Pa motibo cu pa minister Rhuggenaath placa y ganashi ta mas importante cu salu di hende. Minister Rhuggenaath a entrega Corsou den man di Hulanda cu e meta pa nan uza nos como trampolin pa KLM, Coriendo cu TUI sigui haci negoshi den Caribe y Sur Amerika y sigui gana placa bruto. Minister Rhuggenaath a makista nos, abusa di nos, brongosa nos pa por cumpli cu KLM, TUI y Corenden esta gran capital Hulandes y Gobierno Hulandes y nan negoshi nan aki na Corsou. Si nos ta asina mal comportando y cu contagio nan ta sigui subi, dicon minister Rhuggenaath no ta para vuelonan di KLM, Coriendo cu TUI pa asina yuda baha e risico pa nos poblacion? Pasobra biahero di un pais cu codigo cora no por ta bon bini den niun pais cu ta respeta y balora su mes.
Den december awor ta bini mas avion pa aterisa aki na Corsou. E biaha aki for di Merca otro pais cu contagio desbordante. Pueblo bo ta compronde ta pakico ta papia malo y sigui makista nos? Bo ta compronde dicon ta hunga e wega psicologico aki cu bo? Ta pa bo keda sumiso y sinti bo mes culpabel di e cifranan cu ta keda subi tur dia? Pasobra nos gobièrnu ta sirbiendo kapital. Kapital ta mas importante cu salu, bienestar i bida di hende. Ta esey ta minister Rhuggenaath sostene pa PAR y MAN.
19 di maart 2021 abo tin e yabi pa e cambio den bo man, Paso Por otro. Causa Prome.
