Venezuela despues di eleccion di 6 di december: Ki futuro oposicion tin?

Dia 6 di december proximo lo tin eleccion parlamentario na Venezuela. Un eleccion completamente den estilo di e actual dictadura, cu ausencia di gran parti di oposicion politico. Esaki segun mayor parti di mundo democratico ta ilegitimo y no valido. Pero kico esaki ta significa pa oposicion cu entrante 5 di januari proximo, ora e periodo constitucional di e actual Asamblea Nacional termina? Reduci pa e dictadura na mero ciudadano comun y coriente, kico ta nan perspectiva despues di e fecha aki?

Na december 2015 a sucede algo singular den bida politico reciente Venezolano: e dictadura Chavista, den nan afan pa aparenta democratico, a tene eleccion liber, cu e pensamento cu Chavismo lo prevalece den esaki y mantene un posicion di poder den Asamblea Nacional, e pais su parlamento unicameral. E resultado tabata un victoria grandi pa e partidonan opositor, conquistando casi un mayoria di dos tercio den Asamblea.

Durante henter e periodo di e asamblea, gobierno Chavista a haci uso di tur instrumento pa obstaculisa funcionamento di e parlamento, principalmente a traves di nan Tribunal Supremo di Husticia, nombra di manera ilegal ignorando e aprobacion di e mesun parlamento, cuminzando cu e declaracion di ‘den desacato’ di e Asamblea pa e aceptacion di tres diputado di Amazonas, di ken e eleccion a ser cuestiona pa Chavista. Despues a cuminza sistematicamente persigui parlamentario opositor, cu aresto y enhuiciamento ilegitimo, mientras otronan a busca nan seguridad den exilio.

Tambe e Chavistanan a pasa pa institui nan propio Asamblea Constituyente, consistiendo, despues di eleccion ilegitimo facilita pa nan Tribunal Supremo na juli 2017, di un composicion unipartidista, cu lo a haya e tarea di skirbi y aproba un Constitucion nobo. Hasta den un ambiente completamente controla pa nan mes, e Chavistanan no a logra mas cu permiti e Asamblea Constituyente funciona como un tipo di ‘cheerleader’ pa e lidernan Chavista. Banda di esey, a bin un complicacion inespera. Segun Constitucion di e pais, contratonan importante cu gobierno ta cera, sigur esunnan unda recurso natural di e pais ta involucra, mester aprobacion di Asamblea Nacional, e berdadero. Esaki a cuminza haya consecuencia pa relacionnan economico den exterior, unda hasta e amigonan di Rusia, a cuminza mustra riba e necesidad di contratonan aproba, pa no hinca nan mes den problema legal serio despues, loke tambe ta conta pa nan empresanan estatal cu ta opera den e mundo internacional, aceptando reglanan di wega di cortenan internacional. Un di e paisnan cu a ignora e realidad legal aki ta gobierno di Aruba, cu na juni 2016 a cera un contrato cu Pdvsa/Citgo, cu un contrato cu nunca a yega Asamblea Nacional pa su aprobacion.

Un periodo special den e guera entre gobierno y Asamblea Nacional a cuminza na januari 2019, tempo cu presidente di Asamblea, Juan Guaido, a base di articulo 233 y 333 di Constitucion a proclama su mes presidente interino, argumentando cu e presidencia di Maduro, conquista via eleccion presidencial na mei 2018, cu exclusion di gran parti di oposicion, tabata ilegitimo. Cu apoyo di gobierno Mericano Guaido a logra crea un situacion unico, unda gran parti di e paisnan democratico di Europa y continente Americano a reconoce su regimen interino, pa por organisa eleccion presidencial liber y democratico. Casi dos aña despues, de facto e regimen Chavista a sigui na poder, cu tur e cuerponan arma na nan banda, y a pesar tambe di e situacion economico critico den e pais. Riba su mes e tabata algo singular cu un regimen, cu na otro momento no a vacila pa aresta, tortura y asesina contrincante politico, a comprende bon cla cu Guaido tabata un tipo di ‘untouchable’, aunke varios di e hendenan den su alrededor a experimenta e crueldad di e regimen cu prison, tortura y morto. Algun mensahe di parti di gobierno Mericano tabata loke Nicolas Maduro y su cupula si a comprende bon, y esey ta cu mishi cu Guaido lo inicia algo cu e banda gobernante no kier mira sucede.

Sin embargo, cu e balance di poder fragil aki, y e situacion economico siguiendo su curso rumbo pa un imaginable abismo, tempo a cuminza bira un factor cu por traha tambe na fabor di e Chavistanan. Esey ta cu segun Constitucion na december proximo mester tin eleccion parlamentario y na januari mester tuma lugar instalacion di Asamblea Nacional den su composicion nobo. Cu oposicion berdadero, e partidonan cu berdaderamente ta conta cu cierto apoyo popular, manera Primero Justicia, Voluntad Popular, partido social democrata Accion Democratica (AD), y varios otro, sin participacion, ta previsible cu partido Chavista PSUV lo por impone cu un mayoria nobo den Asamblea Nacional, poniendo e actual parlamentarionan un banda a base di forza, y proclamando cu e Asamblea Nacional ta un organo elegi di manera legal, aunke mundo civilisa ta bisa cu no, y ta reduci e parlamentarionan opositor na simple ciudadano comun y coriente, cu tur consecuencia pa nan seguridad personal, tumando na cuenta e mentalidad delincuente di e actual regimen.

Nos por bay experimenta un fase nobo di persecucion politico, mientras cu e ex-parlamentario no tin ningun proteccion mas? Na hopi ocasion e Chavistanan a demostra cu nan no tin mucho consideracion pa loke e paisnan di Union Europeo y di e propio continente ta pensa di nan regimen delincuente. Ademas, cu e situacion economico empeorando rapidamente, busca nan refugio den un persecucion mas extenso ta parce solamente un cuestion di tempo. Den ultimo par di aña e regimen Chavista a logra haya net suficiente apoyo di nan amigonan ideologico, Rusia, China, Cuba y Iran, pa nan por sobrevivi, a pesar di e situacion di escasez cu tin gran parti di e poblacion den un situacion di gran necesidad. Sin embargo, ta parce cu e regimen ta manteniendo e minimo logistico cu nan mester pa por tin control policial y militar den e teritorio y riba e poblacion, hasta sin cu nan mester recuri na tanto ehecucion extrahudicial manera tabata e caso te recientemente.

Hopi importante den e situacion ta e posicion di gobierno Mericano, cu lo mester enfrenta e situacion geopolitico unda mas y mas tin presencia na Venezuela di Iran y gruponan manera Hezbollah, banda di e presencia di Cuba desde varios aña. Mientras e sancionnan di gobierno di Trump a causa bastante problema pa Venezuela por exporta crudo, loke a afecta nan situacion financiero severamente, esey no tabata suficiente pa e regimen yega na negocia un salida na mesa. E excepcionnan cu tabatin riba e embargo di exportacion di crudo, entre otro pa e empresanan Chevron (USA) y Repsol (Spaña) y Eni (Italia), y e permiso pa debolbe Venezuela diesel como pago pa e crudo, tabata suficiente pa e regimen priorisa nan poder logistico pa evita collapse di e mantenimento di poder real den e teritorio. Ta parce cu e regimen lo ta capaz pa mantene e situacion aki pa bastante mas tempo, sigur pasobra tin oposicion politico, pero cu no tin ningun poder real, esta poder arma di nan banda. Ta dificil imagina cu un regimen cu ademas a converti den e punto central di logistica di narcotrafico den nos region, ta desaparece despues di acepta salida na mesa di negociacion. Cu esaki ta aparece un perspectiva bastante negativo pa Venezuela. Si oposicion Venezolano no por a convence Trump pa interveni na Venezuela, mucho menos esey ta parce un opcion real na e momento aki cu gobierno di Biden. Cu esey, ta realistico cu e situacion na e pais bisiña por keda pa hopi tempo mas un problema, unda e situacion hasta por bira mas serio, sigur si despues di eliminacion di e actual Asamblea, persecucion amplio di oposicion, y consecuentemente un situacion mas grave di refugiado na e paisnan bisiña, incluso Aruba, ta parce un opcion temible, pero real.