Minister di Salud Publico Dangui Oduber a kibra cu un areglo di aña 2000, esta cu tur locual ta servicio riba salud publico mester keda pa AZV. Bon Dia Aruba a ricibi copia di un decision di Conseho di Ministro, unda a aproba nombramento di cinco trahador, incluso un coordinador di Minister Oduber, pa ehecuta e servicio di transporte di pacient pa AZV. E presupuesto pa e gasto aki sinembargo no ta pa AZV, sino ta core pa cuenta di Gobierno.

Tabata dia 17 di Augustus cu Minister Dangui Oduber a presenta e proposicion pa nombra Jonathan Tromp, Oslin Oduber, Andro Ridderstaat, Ryan Croes, Gilbert Webb y Adriana Quandt como chauffeurnan pa e transporte di cuido. Ademas di e cinco personanan aki cu awor a tuma e tarea di transporta pacientnan di AZV, tambe a nombra Roxanne Solognier entrante 1 di September 2020 como hefe di e seccion di Cuido di Hende Grandi (Ouderenzorg) na Departamento di Salud Publico, DVG.

Tur e personanan aki tabata traha na Buro di Minister di Salud Publico y a pasa pa DVG, cu e medionan (salarionan) competente, segun e propio documento.

E documento ta mustra cu Conseho di Minister a tuma e decision riba 1 di September y cu e carta a drenta DVG oficialmente dia 11 di September 2020. E argumento cu a usa ta cu mirando e importancia y necesidad pa transporte di personanan di edad, incluso pacientnan di dialyse, a bay di acuerdo cu e proposicion di Minister Dangui Oduber, anticipando formacion di rapport di DVG.

Aunke cu e chauffeurnan no a drenta servicio permanente di DVG, Bon Dia Aruba a comprende cu nan a ricibi un contract di 5 aña. E pregunta cu a haya ta con por anticipa riba un plan di formacion di DVG, y ta nombra hende pa 5 aña, sin tene cuenta cu e plan mes. Mas ainda, ta bay di acuerdo pa transferi fondonan pa DVG pa asina cubri e salarionan.

E decision aki a cay net prome cu directiva di AZV a pone ex-director Ruben Goedhoop riba non-actief. No tabatin mucho claridad pa e motibo, sinembargo locual ta conoci, cu Goedhoop a renoba un contrato cu e compania cu semper tabata encarga cu transporte di pacient di dialyse. Pa fin di october a termina e contrato cu Ruben Goedhoop a cambio di un ‘golden handshake.’

Pero mas yamativo ta cu ora cu a introduci AZV pa henter comunidad na aña 2000, a dicidi cu tur servicio cu tin di haci cu cuido, mester pasa pa AZV. DVG no a keda cu ningun servicio curativo cu ta dirigi na publico. Cu e paso aki a trece algun tarea back pa Pais Aruba. Mester bisa cu AZV tambe ta keda brinda un servicio di transporte, pero unicamente pa esnan cu mester bay Wondenpoli.

Otro informacion cu Bon Dia Aruba a ricibi ta cu e servicio cu ta bay duna pa transporta pacient ta di 7or di mainta te cu 4or y mey di atardi, sinembargo e cinco personanan aki cu tabata traha directamente cu Minister di Salud Publico lo keda 24 ora cu e autonan. No ta conoci si nan ta cumpli cu tur requisito pa por haci un trabao di transporte na forma responsable y si a pasa un training special, mirando cu aki ta trata di un servicio hopi specialisa.

E decision sin embargo ta yama hopi atencion, mirando cu net awor Prome Minister a firma e acuerdo cu Hulanda pa e landspakket y e organo di Reforma y Desaroyo, ademas cu a pasa e Colegio di Supervision Financiero, bao di un Rijkswet. E enfoque di e landspakket ta pa condiciona e ayudo di liquidez di Hulanda na reforma di gasto publico. Entre otro lo mester revisa y reevalua tur funcion den aparato publico pa nan necesidad, efectividad, eficiencia, productividad y si e salario cu nan ta ricibi ta cuadra cu nan responsabilidad. E intencion di reforma ta pa baha e gasto di operacion di Gobierno.

Bon Dia Aruba a tuma contacto directo cu Minister Dangui Oduber, pero te na ciere di nos edicion, no a logra haya un comentario di e Minister di Salud Publico.