Ayera a keda anuncia un campaña cu ta busca promove y stimula comercio local y cune yuda reactiva economia di nos pais cu e aña aki a haya un slaag pisa pa efecto di e pandemia di e Covid. E campaña aki ta hiba e nomber subhetivo “Cumpra Local Di Nos Pa Nos Mes!” e ta wordo promovi pa e unidad Idea di departamento di Asunto Economico.

Minister di Asunto Economico, Xiomara Maduro a declara na Bon Dia Aruba cu nan a dicidi di bini na caya grandi of caya Betico Croes, ya cu pa añanan e ta un centro cu semper a conoce e parti di actividad comercial den nos pais. Un caya cu ta conoce su retonan ya cu comercio no ta wordo concentra mas den centro di ciudad, sino cu tempo actividad comercial a bay na otro luganan, unda a concentra hunto cu e parti turistico.

Actividad economico

E ta haya cu e panorama economico ta mustrando un poco mas alentador desde cu a bin cu cierto reapertura di nos frontera y flexibilidad di algun medidanan pa contene e virus di Covid. E ta haya cu e casonan a baha y logicamente e perspectiva economico ta bira mas positivo, ya cu turismo ta cuminsa reactiva.

Un ehempel tin di haci cu diasabra siman pasa caminda 24 vuelo a bin Aruba. E ta algo cu pa varios luna nos no a experiencia. Tambe Jet Blue a inaugural un vuelo for di Newark, cu ta e caminda unda mas nos tin mester haya turista Mericano. E ta haya cu esaki nos por wak caba den e actividad rond cu comercio ta cuminsa lora pasobra turismo ta e motor pa nos economia.

Nos ta yegando fin di aña y minister Maduro a bisa e matutino aki cu e calculacion cu nan ta bin haciendo pa loke ta crecemento economico ta mustra algun cambio. Na luna di augustus a wordo haci un calculacion cu a mustra cu e caida tabata menos economicamente. Na inicio di aña nan a pronostica pa 44%.

E cifra porcentual aki a bira 36% y recientemente a bira 29%, segun nan calculacion. Pero e ta kere cu pa loke ta resta di e aña aki kisas e calculacion ultimo aki lo bay mustra nos cu e caida ta menos cu esey. “Esaki ta refleha -segun e minister- cu economia ta bay cuminsa recupera. Pero e ta haya mas importante cu nos propio hende a sa di yuda nos mes pa economia a keda lora toch. Ademas nos industria di turismo tin e confiansa cu nos bishitantenan ta bini bek, ya cu Aruba ta un bon producto.

E ta haya cu esaki ta un perspectiva positivo. Ademas nan a bin cu un alivio fiscal e luna aki y cu ta sigui pa e dos aña nos dilanti pa yuda specialmente e empresarionan chikito y mediano cu ta representa mas cu un 90% di e musculo di nos economia nacional.

Tambe el a referi na e Master Plan pa busca solucion den inmediato pa kita e fenomeno conoci como “red tape.” Nan a bon cu e parti digital pa bo por lanta bo negoshi, y tambe nan ta trahando den cos mas logistico. Den caya e tram ta wordo para un rato pa brinda e oportunidad pa e hendenan por transcuri libremente den caya cu auto y laga un hende pa cumpra algo pa asina incentiva comercio.

Campaña compra local

E campaña “Cumpra Local Di Nos Pa Nos Mes!” aki ta busca incentiva nos pueblo en general pa por sostene comercio local. E campaña ta bin di pariba di brug te pabao di brug, asina minister Maduro a bisa. Pues no solamente e tin cu haber cu Playa sino cu San Nicolas tambe, pero nan a dicidi di start e campaña aki simbolicamente den caya principal, unda comercio organisa practicamente a cuminsa na Aruba.

E mensahe tras di e campaña aki -segun e mandatario- ta cu nos mes mester traha pa nos recuperacion. “Nos recuperacion economico ta bay depende di nos mesun forsa,” el a expresa. No solamente di e forsa di cumpra algo pa chikito of grandi cu e por ta, pero tambe di e forsa cu nos por apoya otro. Esaki no solamente ta yuda nos economia y tambe e comerciantenan, sino tambe e trahadonan cu ta un persona local pa e por sostene su famia.

Den e campaña aki nan a recuri na nos cantante talentoso Jeon pa produci un jingle contagioso y un video clip unda e ta bin for di pariba di brug realisando su compra local te cu e ta caba riba su bicicleta dilanti di emblematico negoshi La Moderna unda e ta saluda e legendario comerciante Benchi Pick.

Den cuadro di e lansamento di e programa di compra aki nan a haci uzo di oportunidad pa brinda un reconocimento na e comerciante aki. “Benchi ta personifica e perseverancia y e parti empresarial cu nos mester tin. Pero mas cu tur e confiansa den Aruba su economia y su hendenan,” segun minister Maduro.