Diabierna tabata un dia grandi pa tiradonan di pisca ora cu finalmente nan a firma pa haya nan permiso pa por tira pisca. Parlamentario Alan Howell tabata presente na e ocasion aki cu a tuma luga na Santa Rosa. Presente tabata Ministernan Andin Bikker y Chris Romero, cu ta e dos ministernan cu a traha incansablemente pa logra e obhetivo aki.
Howell for di inicio tabata para tras di e lucha di e tiradonan di pisca y a demostra esaki constantemente den Parlamento durante reunionnan publico y den entrevistanan cu diferente medio di comunicacion. Naturalmente e tabata na Santa Rosa pa felicita esunnan cu a haya nan permiso, el a inicia cu “Ora mi papia, mi ta gusta para tras di mi cos!Tiradonan di pisca a gana nan bataya”.
Presente na e ocasion aki tambe tabata parlamentarionan Dellanire Maduro y Ricardo Croes, kende hunto cu Howell y ministernan a celebra e dia tan spera pa e tiradonan di pisca.
Alan a indica tambe cu awo cu nan a haya nan permiso, nan por practica nan tiramento di pisca y asina por trece pan riba mesa pa nan famia sin mester tin problema cu husticia.
El a gradici ministernan Andin Bikker y Chris Romero cu a persisti pa logra e meta aki y tambe na tur parlamentario cu a para duro pa esaki ta un realidad awe. Sr. Joel Tromp y Sr. Leslie De Cota tabatin e honor pa ta e prome tiradonan di pisca cu afirma pa haya nan permiso. “Un pabien na tur tirado di pisca. Un lucha di hopi aña a yega na su fin”, Alan Howell a expresa.
