Despues di tres aña di gobernacion, husticia ta den e etapa di mas malo den su historia y entre e desaster di maneho tin e situacion di rijbewijs cu ta bin ta escala pa algun tempo caba.

Minister encarga, Andin Bikker, den su temporada den oposicion a critica e situacion aki fervientemente y awo cu e ta na mando no a ni haci esfuerso pa drecha/ mehora of alivia e situacion.

Comunidad a presenta kehonan fuerte y valido pa locual ta trata e mal contento den e departamento aki manera entre otro cu ta perhudica hobennan pa haya trabou pa motibo di falta di rijbewijs.

Den entrevista cu miembro di prensa, parlamentario Robert Candelaria (AVP), a duna su opinion riba e situacion andando y ta remarca cu esaki ta topico cu el a señala for di momento cu el a drenta den e posicion di parlamentario. A bishita e departamento di rijbewijs, caminda a indica cu for di tres aña pasa caba con e situacion tabata andando.

Candelaria ta di pensamento cu si a hereda un problema (of algo cu no ta bon) mas cu logico ta pa busca solucion y drecha e situacion. Pero den caso di Minister Bikker esaki no ta e caso den practicamente nada den su departamentonan.

Lamentabel ta cu esunnan cu ta sali perhudica den tur esaki ta e hobennan cu na e momento aki ta den situacion dificil relaciona cu e pandemia (COVID-19) pa haya trabou y cu e obstaculo tumando luga den departamento di rijbewijs ta haci e situacion ainda mas dificil, ya cu e ta un instrumento vital y necesario pa algun trabou.

“Como parlamentario (y den oposicion) nos unico recurso ta di cuestiona e gobierno. Mas di 100 pregunta a bay na varios ocasion na gobernante pa asina busca solucion pero como contesta ta bin un fraccion limita bek.

Idea di bin cu un cambio di ley ta locual cu mandatario Bikker a presenta algun tempo atras pero no solamente ta laat despues di tres aña di gobernacion, pero no a tuma nota cu e problema ta sinta den e maneho interno di duna examen, cual ta pegando,” ta locual a bin dilanti den e entrevista cu Candelaria.

Di su banda Robert Candelaria ta duna di conoce cu si ta trata di un cambio di ley, na momento cu present’e, lo ta algo masha facil pa trata, pero ta di lamenta cu si algo no ta kibra, no tabata tin motibo pa drech’e. Digitalisacion y envolvimento di Censo pa atende cu rijbewijs tabata cambionan cu lo a bin dilanti, pero ta algo cu mester a perfecciona prome cu dicidi di elimina e sistema anterior. Obstaculisando y perhudicando grandemente esunnan cu mester di nan rijbewijs na ordo.

Candelaria di su banda ta purba di tin comprension pa e minister mirando cu e cargo/tarea no ta uno facil, pero cada biaha su escogencianan ta robes. Para un sistema existente cu tabata funciona, pa bin cu un sistema nobo cu no a resulta y ta perhudicando hopi hende. Mehoracion semper ta algo positivo, innovacion ta algo bon tanten cu e no ta perhudica. E sistema anterior tabata funciona y tanten mester a keda uz’e te na momento cu perfecciona e sistema nobo. Si acaso ta un “score” Politico kier a logra cu introduccion di un rijbewijs nobo, anto e no a funciona!