Aruba mester facilita tur Rijksambtenaar y nan famia y/of partner e facilidad pa por biba aki sin e molester di pasa na DIMAS pa haya permiso di estadia. Pa hopi aña, e tema aki tabata topico di discusion entre Hulanda y Aruba. Particularmente pasobra te hasta famianan di hueznan cu ta bin traha na Aruba ta suheto na permiso di estadia y mester cana un proceso na DIMAS. Mescos ta conta pa mariniernan cu bin Aruba, unda hopi biaha e experiencia na Aruba ta bira negativo pa motibo cu e requisitonan pa famia por biba aki y registra na Censo ta hopi dificil. Como tal, un di e exigencianan cu e Rijkswet pa e landspakket pa Aruba, a cambio di sosten di liquidez ta exigi un maneho cla y facil pa 15 di December venidero. E organo Caribense di Reforma y Desaroyo a determina cu partner y miembronan di famia di ambtenaarnan Hulandes cu a keda designa pa trabo na Aruba, lo haya admision automatico sin mester pasa e proceso di haya permiso di residencia di DIMAS.

Pone exigencia den perspectiva

Pero, Director di DIMAS Kathy Ruiz Paskel di su banda ta nenga cu ta haci e proceso dificil.

Al contrario, pa loke ta e famianan di ambtenaarnan Hulandes, DIMAS ta traha segun un instruccion di Minister di Husticia cu a decreta na 2018 caba cu famianan di Hulandesnan Europeo cu mester bin traha na Aruba no ta requeri pa pasa e trayectoria di DIMAS y cu nan por keda inscribi na Censo.

“Mester pone e ponencia di COHO den perspectiva. Famianan ya caba ta den un maneho di preferencia basa riba un trayecto di cambio di ley di Minister di Husticia. Paskel ta sigura cu tabatin atencion pa e asunto aki. Ya caba den practica, tur hende ta haya, anticipando e ley ta haya e status di admision ‘van rechtswege’ y esey ta conta pa nan famia tambe.”

Si un huez bin Aruba,

Si usa un huez como ehempel, e ta cay bao di un Rijkswet cu ta regla esey, esta cu ta admiti e famia tambe ‘van rechtswege.’ Ruiz Paskel ta kere cu e proceso por pega na Censo, cu tambe tin su regla ken y ki ora por yega pa registra.

Esaki ta a base di un cambio di ley na December 2018 cu ta regarda Censo, unda a introduci un procedura nobo unda cada persona cu bin registra, sea ta famia di huez y/of partner, cu prome por a hacie sin intervencion di DIMAS, mester tin un prueba cu nan tin e derecho. “Y e caminda pa haya e prueba ey ta DIMAS.

Dus cada marinier, fiscal, huez Hulandes cu bin Aruba mester bay DIMAS pa e formularionan pa demostra na Censo cu nan por keda inscribi. Mescos ta conta pa nan famia. Nos tin un protocol di cooperacion y berdad nan ta pidi DIMAS. Nos ta hink’e den sistema y Censo tin acceso na sistema y ta wak cu berdad ta trata di personanan cu mester keda registra.”

Paskel ta admiti si cu tin caminda pa bira mas eficiente, pero entretanto a yega hopi leu. Tin hopi cooperacion cu mayoria servicio cu ta traha cu personal cu ta bin di Hulanda pa duna asistencia, cu por tin account manager dedica pa nan y asina facilita e proceso.

“Na principio, berdad e proceso no tabata cana facil. Pero pa un aña caba e ta bayendo bon. Awor e aspecto formal lo keda regla den e ley, segun exigencia di COHO.”

VNO

Di otro banda, Bon Dia Aruba a acerca VNO Aruba pa confirma si berdad e proceso di DIMAS a cambia pa e miembronan di famia di ambtenaarnan di Reino cu mester bin Aruba, ademas di e e partnernan (y famia) di mariniernan. Te ainda, cualkier ambtenaar Hulandes cu mester bin traha na Aruba, sea ta pa Corte, Gabinete di Gobernador, VNO, cu ta permiti ‘van rechtswege’ mester busca formulario na DIMAS prome cu registra na Censo. “Pero e miembronan di famia y partnernan mester pasa e proceso regular,” ta locual David Abrahams di VNO Aruba a bisa Bon Dia Aruba.

Netamente esaki tabata e keho desde cu a introduci e LUTV na 2007. Na 2019 tabatin diferente reunion pa casonan specifico y berdad despues di a reuni cu e Director, algun di e procesonan a cana mihor.

Pero, e situacion no a mehora structuralmente prome cu e periodo di Covid, cu ta mustra cu e organisacion mes no ta carga e palabracionnan. Pasobra te recien ainda, apesar di e palabracionnan cu ta bay cambia e Landsverordening Uitzetting Toelating Vreemdelingen, LUTV, pa trece ahuste pa Hulandesnan Europeo cu mester bin traha na Aruba, esaki no a sucede ainda, contrario na e situacion na Corsou y St. Maarten.

E cambionan na Aruba no a bin y aunke cu tin comprension pa e bon intencion di Director di DIMAS, realidad ta si cu den e organisacion mes no tur ora tabata of ta coopera pa facilita e proceso. “Esaki ta motibo tambe pakico te cu na comienzo di 2020 ainda tabata hiba deliberacionnan na nivel halto pa e grupo di hende aki,” ta locual VNO Aruba a bisa Bon Dia Aruba. Y esaki ta motibo tambe pakico pa COHO, esaki ta un di e prome condicionnan pa cambio.