Republica Dominicana a habri pa turismo 1 di october, cu un epidemia di Covid-19 ainda na nivel di por lo menos 20.000 caso activo pa dia. Mas di siete siman despues e situacion sanitario ey no a mehora. Ministerio di Salud Publico a reporta diadomingo 22 di november 640 caso nobo di coronavirus na e pais, un reduccion di 346 compara cu e dia anterior, unda tabatin no menos cu 986 caso nobo.
E entidad a señala cu a procesa 8.230 prueba di cual 5.615 tabata riba pacient pa promer biaha. Te diadomingo pasa (22 di november) e pais a registra 138.410 caso di Covid-19, di cual ainda 23.548 ta activo. A fayece desde inicio di e epidemia 2.310 persona, pa un tasa di letalidad di 1.67%. Desde 1 di october, unda tabatin 22.415 caso activo, e cantidad diario a keda subi te na 23.372 dia 21 di november. CDC di Merca ta keda mantene su code oraño di alerta pa e pais (Level 3 di aviso di biahe: reconsidera biahe pa e pais pa condicionnan di salud y seguridad relaciona cu Covd-19).
Republica Dominicana ta un di e paisnan mas afecta pa e virus den region di Caribe, y ta lider tambe den cantidad di caso. Te diadomingo pasa e total di caso den region di Caribe a surpasa 270.000, di cual Republica Dominicana tin alrededor di 50% di e total. Den e lista no a bin tanto cambio mas, cu Puerto Rico ainda como segundo pais cu mas caso, cu 43.403 caso y 982 morto. Na tercer lugar Guiana Frances cu tin 10.930 caso positivo, 70 morto y 9.995 caso recupera.
